టిడిపిలో కొత్త లొల్లి, హరీశ్వర్ రెడ్డిని ప్రశ్నించిన మహేందర్ రెడ్డి

హైదరాబాద్‌: తెలుగుదేశం పార్టీలో కొత్త లొల్లి ప్రారంభమైంది. రంగా రెడ్డి జిల్లాలోని తాండూరులో జరిగే తెలుగుదేశం తెలంగాణ ప్రాంత నాయకుల తెలంగాణ రణభేరీ సభకు సంబంధించి తన ఫొటో పెట్టడంపై హరీశ్వర్ రెడ్డి వ్యతిరేకత వ్యక్తం చేస్తున్నారు. అయితే, హరీశ్వర్ రెడ్డిపై పార్టీ మరో శాసనసభ్యుడు మహేందర్ రెడ్డి ప్రశ్నలు సంధిస్తున్నారు. హరీశ్వర్ రెడ్డి తెలుగుదేశంలో ఉన్నారో లేదో చెప్పాలని, దాన్ని బట్టి తాము నిర్ణయం తీసుకుంటామని ఆయన బుధవారం మీడియా ప్రతినిధులతో అన్నారు. తాను తెలుగుదేశంలోనే ఉన్నానని హరీశ్వర్ రెడ్డి చెప్పారు కాబట్టి ఫొటో పెట్టామని ఆయన అన్నారు.

తాను తెలుగుదేశంలో ఉన్నానని చెబుతూనే పార్టీ అధ్యక్షుడు నారా చంద్రబాబు నాయుడిపై హరీశ్వర్ రెడ్డి విమర్శలు చేస్తున్నారని ఆయన అన్నారు. తన మాటల్లోని అర్థం ఏమిటో చెప్పాలని ఆయన హరీశ్వర్ రెడ్డిని డిమాండ్ చేశారు. చంద్రబాబు తెలంగాణ వైఖరిని హరీశ్వర్ రెడ్డి తీవ్రంగా వ్యతిరేకిస్తున్నారు. పైగా, పార్టీ నుంచి సస్పెండ్ అయిన నాగం జనార్దన్ రెడ్డికి ఆయన మద్దతిస్తున్నారు. తాను నాగం జనార్దన్ రెడ్డి వెంటే ఉంటానని చెప్పారు. ఈ పరిస్థితిలో తాండూరు సభపై వివాదం చోటు చేసుకుంది.

English summary

TDP MLA Mahender Reddy has questioned his party MLA Hariswar Reddy on Telangana public meeting.