బొత్స ఆకారం పెద్దది, గొంతు అంతకన్నా పెద్దది కానీ... : టిజి వెంకటేష్

By Srinivas

Published: Wednesday, June 8, 2011, 15:43 [IST]

కర్నూలు: ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణపై చిన్న నీటి పారుదల శాఖ మంత్రి టిజి వెంకటేష్ బుధవారం ప్రశంసలు కురిపించారు. బొత్స సత్యనారాయణది ఆకారం పెద్దది, గొంతు అంతకన్నా పెద్దది అని కానీ మనసు మాత్రం చాలా మంచిదని ప్రశంసించారు. బొత్స సత్యనారాయణ పిసిసి అధ్యక్షుడిగా ఎన్నిక కావడాన్ని ఆయన స్వాగతించారు. బొత్స ఎన్నిక కాంగ్రెసు పార్టీలోని అందరికీ ఆమోద యోగ్యమని చెప్పారు. ఆయన కాంగ్రెసుకు ఖచ్చితంగా పూర్వ వైభవం తీసుకు వస్తారనే నమ్మకం తనకు ఉందన్నారు. బొత్స అన్ని ప్రాంతాలను, నాయకులను కలుపుకొని వెళ్లి పని చేస్తారని అన్నారు.

బొత్స నియామకం తెలంగాణకు అనుకూలమనే భావనతో తాను ఏకీభవించలేనని టిజి అన్నారు. తెలంగాణవాదులు ఉద్యమం చేసుకోవచ్చునని అన్నారు. అయితే రాష్ట్ర అభివృద్ధిలో మిళితం అవుతూ ఉద్యమం చేస్తే బావుంటుందని సూచించారు. తెలంగాణకు సరియైన మార్గాన్ని అధిష్టానమే సూచించాలని ఆయన అభిప్రాయ పడ్డారు.

Published On June 8, 2011