వైయస్ జగన్, తెలంగాణ ఎఫెక్ట్: స్థానిక సంస్థల ఎన్నికలు వాయిదా!

By Srinivas

Published: Thursday, June 9, 2011, 15:06 [IST]

హైదరాబాద్: సీమాంధ్రలో వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి, తెలంగాణలో ప్రత్యేక రాష్ట్ర ఏర్పాటు ఉద్యమాల నేపథ్యంలో రాష్ట్ర ప్రభుత్వం స్థానిక సంస్థల ఎన్నికలకు వెనక్కి తగ్గినట్లుగా తెలుస్తోంది. స్థానిక సంస్థల ఎన్నికలను వాయిదా వేయడానికి ప్రభుత్వం కసరత్తు చేస్తున్నట్లుగా తెలుస్తోంది. అందుకు చట్టాన్ని కూడా తీసుకు రావడానికి ప్రయత్నాలు చేస్తున్నట్టు తెలుస్తోంది. స్థానిక సంస్థల ఎన్నికలను ప్రభుత్వం నిర్వహిస్తుందా లేదా ఈ నెల 11వ తేది లోగా చెప్పాలని ఎన్నికల కమిషన్ ఆదేశించిన నేపథ్యంలో రాష్ట్ర ప్రభుత్వం సుప్రీం కోర్టు తీర్పును చూపిస్తూ ఎన్నికలను వాయిదా వేయాలని చూస్తున్నట్లుగా వార్తలు వస్తున్నాయి. స్థానిక సంస్థల ఎన్నికలను వాయిదా వేస్తున్నట్లు ఇప్పటికే ముఖ్యమంత్రి కార్యాలయం మంత్రులకు నోట్ జారీ చేసినట్లు తెలుస్తోంది. ఈ నెల 16వ తేదిన వాయిదా చట్టాన్ని మంత్రివర్గం ఆమోదం చేసే దిశలో ముందుకు కదులుతున్నట్లుగా తెలుస్తోంది.

రిజర్వేషన్‌లలో 50 శాతం దాటకూడదన్న సుప్రీం తీర్పు ప్రకారం ప్రభుత్వం వెనక్కి తగ్గినప్పటికీ ప్రముఖంగా ప్రస్తుత పరిస్థితుల్లో కాంగ్రెసు స్థానిక ఎన్నికలను ఎదుర్కునే సత్తా లేకనే వెనక్కి తగ్గుతున్నట్లుగా తెలుస్తోంది. సీమాంధ్రలో జగన్ ప్రభావం, తెలంగాణలో ఉద్యమ తీవ్రత దృష్ట్యా అధికార కాంగ్రెసు పార్టీ స్థానిక ఎన్నికలు నిర్వహిస్తే ఘోర పరాజయం మూటగట్టుకుంటుందనే వార్తలు వినిపిస్తున్నాయి. ప్రస్తుత పరిస్థితుల్లో కాంగ్రెసుకు నాయకత్వ సమస్య కూడా ఉంది. పార్టీకి లాభం కలుగుతుందన్న దశలోనే ఎన్నికలు నిర్వహించాలనే యోచనలో ప్రభుత్వం ఉన్నట్లుగా తెలుస్తోంది. సర్పంచ్, జెడ్పీటీసి, ఎంపీటీసిలతో పాటు సెప్టెంబర్‌లో జరగనున్న మున్సిపాలిటీ ఎన్నికలు నిర్వహించే విషయంలో కూడా ప్రభుత్వం మరో ఆలోచన చేసే పరిస్థితి కనిపిస్తోంది. అయితే స్థానిక సంస్థల ఎన్నికలకు ప్రభుత్వం వెనక్కి పోతుందనే వాదనలు వినిపిస్తున్నప్పటికీ మంత్రి ఆనం రామనారాయణ రెడ్డి మాత్రం స్థానిక సంస్థల ఎన్నికలు జరుగుతాయని స్పష్టం చేస్తున్నారు.

Published On June 9, 2011