నాకు బలం లేదు, చంద్రబాబుకు దమ్ములేదు: అవిశ్వాసంపై వైయస్ జగన్

By Srinivas

Published: Monday, June 13, 2011, 16:37 [IST]

చిత్తూరు: రాష్ట్రంలోని ప్రజా సమస్యలను పరిష్కరించడంలో అన్ని విధాలా విఫలమైన ముఖ్యమంత్రి కిరణ్ కుమార్ రెడ్డి ప్రభుత్వంపై తెలుగుదేశం పార్టీ అధ్యక్షుడు నారా చంద్రబాబునాయుడు ఎందుకు అవిశ్వాస తీర్మానం పెట్టడం లేదని వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి సోమవారం చిత్తూరులో విలేకరులతో మాట్లాడుతూ ప్రశ్నించారు. రైతాంగ సమస్యలపై సాగుపోరు అనంతరం ఆయన విలేకరులతో మాట్లాడారు. ఈ సందర్భంగా ఆయన టిడిపి చిత్తశుద్ధిని ప్రశ్నించారు. గతంలో తన పార్టీకి 46మంది ఎమ్మెల్యేలు మాత్రమే ఉన్న సమయంలో దివంగత ముఖ్యమంత్రి వైయస్ రాజశేఖరరెడ్డి ప్రభుత్వంపై ఆనాడు చంద్రబాబు అవిశ్వాస తీర్మానం పెట్టారని గుర్తు చేశారు.

ఇప్పుడు తనకు 90 మంది ఎమ్మెల్యేల మద్దతు ఉన్నప్పటికీ అవిశ్వాసం ఎందుకు పెట్టడం లేదని ప్రశ్నించారు. తనకు బలం లేనందునే తాను అవిశ్వాసం పెట్టడం లేదని అన్నారు. తనకు బలం ఉంటే ఎప్పుడే తీర్మానం ప్రవేశ పెట్టే వాడినని స్పష్టం చేశారు. చంద్రబాబు అవిశ్వాస తీర్మానం పెడితే ప్రభుత్వం పడిపోతుందా లేదా అన్న విషయం సెకండరీ అన్నారు. ప్రభుత్వం పడిపోతే కన్నీరు పెట్టిస్తున్న ప్రభుత్వాన్ని పడగొట్టినందుకు టిడిపిని ప్రజలు అభినందిస్తారని అన్నారు. పడిపోకుంటే ప్రజా సమస్యల పరిష్కారంలో విఫలమైన ప్రభుత్వాన్ని ఇంటికి పంపించడానికి తాము శాయశక్తులా, చిత్తశుద్ధితో ప్రయత్నం చేశామని ప్రజలకు చెప్పుకోవచ్చు అని టిడిపికి సూచించారు. ప్రతిపక్ష, అధికార పక్షాలు ఏకమయినందువల్లే అవిశ్వాస తీర్మానం పెట్టడం లేదని ఆరోపించారు.

Published On June 13, 2011