జగన్ క్షమాపణ చెప్పి తెలంగాణలోకి రావాలి: కెటిఆర్ షరతు

By Pratap

Published: Tuesday, June 14, 2011, 11:50 [IST]

కరీంనగర్: తెలంగాణలో అడుగు పెట్టడానికి వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి తెలంగాణ రాష్ట్ర సమితి (తెరాస) శానససభ్యుడు కెటి రామారావు షరతు పెట్టారు. తెలంగాణకు వైయస్ రాజశేఖర రెడ్డి చేసిన ద్రోహానికి క్షమాపణ చెప్పి వైయస్ జగన్ తెలంగాణలో అడుగు పెట్టాలని ఆయన డిమాండ్ చేశారు. తెలంగాణ విషయంలో వైయస్ చేసిన తప్పులకు వైయస్ జగన్ బాధ్యత వహించాలని ఆయన మంగళవారం మీడియా ప్రతిధులతో అన్నారు. వరంగల్‌లో సోమవారం కాకతీయ విశ్వవిద్యాలయం విద్యార్థులపై వైయస్సార్ కాంగ్రెసు పార్టీ కార్యకర్తలు దాడి చేయడాన్ని ఆయన ఖండించారు.

తాను జాతీయవాదినంటూ చెప్పిన కేంద్ర మంత్రి ఎస్ జైపాల్ రెడ్డికి ఆయన సవాల్ విసిరారు. తెలంగాణ ఓట్లతో గెలిచిన జైపాల్ రెడ్డి వెంటనే రాజీనామా చేయాలని ఆయన డిమాండ్ చేశారు. రాజీనామా చేసి జాతీయవాదంపై జైపాల్ రెడ్డి తెలంగాణలో మళ్లీ పోటీ చేయాలని, అప్పుడు జాతీయవాదం గొప్పదో తెలంగాణవాదం గొప్పదో ప్రజలే తేలుస్తారని ఆయన అన్నారు. జైపాల్ రెడ్డి జాతీయవాది కాదని, పచ్చి అవకాశవాది అని ఆయన వ్యాఖ్యానించారు.

Published On June 14, 2011