బొత్సపై హర్ష కుమార్ ఆరోపణల వెనుక విహెచ్: ఎమ్మెల్యే రాపాక

By Srinivas

Published: Tuesday, June 14, 2011, 13:46 [IST]

హైదరాబాద్: ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణపై అమలాపురం పార్లమెంటు సభ్యుడు హర్షకుమార్ ఆరోపణల వెనుక పార్టీ సీనియర్ నాయకుడు, ఎంపీ వి.హనుమంతరావు హస్తం ఉందని శాసనసభ్యుడు రాపాక వరప్రసాద్ మంగళవారం ఆరోపించారు. బొత్సను అవినీతిపరుడు అంటున్న హర్షకుమారే పెద్ద అవినీతిపరుడు అని ధ్వజమెత్తారు. మంత్రి విశ్వరూప్‌తో కలిసి హర్షకుమార్‌పై అధిష్టానానికి ఫిర్యాదు చేస్తానని ఆయన చెప్పారు. ఆయనను వెంటనే పార్టీ నుండి బహిష్కరించాలని డిమాండ్ చేశారు.

హర్షకుమార్ ఓఎన్జీసి, రిలయన్స్ నుంచి లబ్ధి పొందుతున్నారని ఆరోపించారు. రాష్ట్రంలో ఆ కంపెనీల నుండి లబ్ధి పొందుతున్న నేత హర్షకుమార్ ఒక్కడే అని ఆరోపించారు. కాగా బొత్సపై హర్షకుమార్ చేసిన ఆరోపణలకు విశ్వరూప్ సోమవారమే తీవ్రంగా స్పందించారు. హర్షకుమార్ పెద్ద అవినీతిపరుడు అని ఆరోపించారు. ఆయనపై చర్యలు తీసుకోవాలని పార్టీని కోరతానని చెప్పారు.

Published On June 14, 2011