గాలి జనార్దన్ రెడ్డికి తప్పిన ముప్పు: గంటసేపు గాలిలో హెలికాప్టర్ చక్కర్లు

By Srinivas

Published: Thursday, June 16, 2011, 14:04 [IST]

బెంగళూరు: కర్నాటక రాష్ట్రానికి చెందిన మంత్రి గాలి జనార్దన్ రెడ్డి ప్రయాణిస్తున్న హెలికాప్టర్ కాసేపు అదృశ్యమైంది. గురువారం ఆయన ఓ ప్రభుత్వ కార్యక్రమంలో పాల్గొనవలసి ఉంది. బళ్లారి నుండి గాలి జనార్దన్ రెడ్డి ఆ కార్యక్రమానికి హెలికాప్టర్‌లో బయలు దేరారు. గాలితో పాటు స్థానిక పార్లమెంటు సభ్యుడు, గాలి వ్యక్తిగత కార్యదర్శి ఉన్నారు. బళ్లారి నుండి కార్యక్రమానికి 40 నిమిషాలలో చేరుకోవాల్సి ఉండగా గాలి గంటన్నర దాటినా రాక పోవడంతో అధికారులలో ఆందోళన ప్రారంభమయింది. గాలి ఎక్కిన హెలికాప్టర్‌కు వాతావరణం అనుకూలించలేదు. వాతావరణం అనుకూలించక పోవడం వల్ల హెలికాప్టర్ కాసేపు అదృశ్యమైంది. హెలికాప్టర్ గాలిలోనే గంటసేపు చక్కర్లు కొట్టింది.

అయితే పైలట్ తన చాకచక్యంతో హెలికాప్టర్‌ను మరో మార్గంలో హవీనాపడవగలిలో లాండ్ చేశాడు. దీంతో అధికారులతో పాటు మంత్రి గాలి జనార్దన్ రెడ్డి కూడా ఊపిరి పీల్చుకున్నారు. కాగా పైలట్ కొత్త వాడు కావడం వల్ల గంట పాటు ఆలస్యం అయిందని తమకు ప్రతికూల వాతావరణం ఏదీ లేదని గాలితో పాటు ప్రయాణించిన ఎంపీ హెలికాప్టర్ లాండ్ అయిన తర్వాత చెప్పారు.

Published On June 16, 2011