తెలంగాణపై వైయస్ జగన్ నిర్ణయం చెప్పాలి: కొండా సురేఖ

By Srinivas

Published: Thursday, June 16, 2011, 15:10 [IST]

వరంగల్: వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి తెలంగాణ ప్రజల మనోభావాలను గౌరవించాలని కాంగ్రెసు పార్టీ పరకాల శాసనసభ్యురాలు, మాజీ మంత్రి కొండా సురేఖ గురువారం విలేకరులతో మాట్లాడుతూ సూచించారు. నాలుగు కోట్ల తెలంగాణ ప్రజలు ప్రత్యేక తెలంగాణ రాష్ట్రాన్ని కోరుకుంటున్నారని దానికి అనుగుణంగానే జగన్ తన నిర్ణయాన్ని తీసుకోవాలని సూచించారు. వైయస్ఆర్ కాంగ్రెసు పార్టీ అధ్యక్షుడిగా తన నిర్ణయాన్ని చెప్పాల్సిన అవసరం ఉందని ఆమె అన్నారు.

త్వరలో స్థానిక సంస్థల ఎన్నికలు వస్తున్నాయనే ఉద్దేశ్యంతోనే తెలంగాణ రాష్ట్ర సమితి మళ్లీ ఉద్యమ బాట పట్టిందని ఆమె ఆరోపించారు. ఎన్నికలు వచ్చినప్పుడు విద్యార్థులను, సామాన్యులను టిఆర్ఎస్ రెచ్చగొడుతుందని ఆమె అన్నారు. ఇటీవల వైయస్ఆర్ కాంగ్రెసు పార్టీ ఆధ్వర్యంలో జిల్లా కలెక్టరేట్‌ల ముట్టడి కార్యక్రమంలో భాగంగా వరంగల్‌లో చేపట్టిన తమ ఆందోళనపై దాడులు తెలంగణవాదులు, విద్యార్థుల పని కాదన్నారు. అది టిఆర్ఎస్ పనే అని అన్నారు.

Published On June 16, 2011