చిరంజీవిని నిలదీసిన మహిళలు: తిరిగి వెనక్కి వెళ్లిపోయిన ఎమ్మెల్యే

By Srinivas

Published: Thursday, June 16, 2011, 14:33 [IST]

తిరుపతి: స్థానిక శాసనసభ్యుడు చిరంజీవికి తిరుపతిలో గురువారం ఉదయం చేదు అనుభవం ఎదురయింది. ప్రజారాజ్యం పార్టీని కాంగ్రెసు పార్టీలో విలీనం చేస్తానని ప్రకటించిన చాలా రోజులకు చిరంజీవి తిరుపతిలో రెండు రోజుల పర్యటనకు వచ్చారు. ఈ సందర్భంగా గురువారం ఆయన తన రెండోరోజు పర్యటన కొనసాగించారు. అయితే తిరుపతిలోని సంజయ్‌నగర్ కాలనీకి చిరంజీవి వెళ్లిన సమయంలో పలువురు మహిళలు చిరును స్థానిక సమస్యలపై నిలదీశారు. సమస్యలు మీరు పట్టించుకోకుంటే ఎవరికి చెప్పాలని అడిగారు.

తమ సమస్యలు పరిష్కరిస్తారని తమకు ఓటు వేసి గెలిపిస్తే సమస్యలు పట్టించుకోవడం లేదని ప్రశ్నించారు. ఎప్పుడో ఒకప్పుడు నియోజకవర్గానికి వస్తారు. ఓట్లు వేయించుకొని గెలిచిన మీకు సమస్యలు పట్టవా అంటూ నిలదీశారు. వచ్చినప్పుడు సమస్యలు వినండి అని నిలదీశారు. అయితే వారు ప్రశ్నిస్తున్న సమయంలో చిరంజీవి వెనక్కి తిరిగి వెళ్లి పోవడం విశేషం. కాగా ఇటీవల కొందరు వెటర్నరీ కళాశాల విద్యార్థులు చిరంజీవి కనిపించడం లేదంటూ స్థానిక పోలీసు స్టేషన్‌లో ఫిర్యాదు చేసిన విషయం తెలిసిందే.

Published On June 16, 2011