పవర్ సెంటర్ పాలి'ట్రిక్స్': పిసిసి చీఫ్ బొత్సపై సిఎం కిరణ్ నిఘా!

హైదరాబాద్: రాష్ట్రంలో ఇప్పుడు పవర్ పాలిట్రిక్స్ నడుస్తున్నాయి. అధికార కాంగ్రెసు పార్టీలో పీఠం మీద కూర్చున్నవారు, పీఠం ఎక్కడానికి ఉబలాటపడుతున్న వారు రాజకీయాలు నెరుపుతున్నారు. తదుపరి ఎన్నికల్లో ముఖ్యమంత్రి పీఠంపై కన్నేసిన పిసిసి అధ్యక్షుడు బొత్స సత్యనారాయణ ఆ మాటను నేరుగానే చెప్పారు. ఇందుకోసం ఆయన తన ప్రయత్నాలు తాను చేస్తున్నారు కూడా. తన సామాజిక వర్గం నేతలతో భేటీ కావడం, కాంగ్రెసు పార్టీలోని వివిధ స్థాయి నేతలతో ముచ్చటించడం వంటివి చేస్తున్నారు. దీంతో ఇప్పటికే పీఠంపై కూర్చున్న ముఖ్యమంత్రి కిరణ్ కుమార్ రెడ్డికి ముచ్చెమటలు పడుతున్నాయి.

తన పీఠాన్ని ఎప్పుడు తన్నుకుపోతాడో అనే భయంతో వచ్చే ఎన్నికలలో తన పీఠాన్ని భద్రంగా ఉంచుకునేందుకు తన ప్రయత్నాలు తాను చేస్తున్నాడు. ఇందులో భాగంగా ముఖ్యమంత్రి కిరణ్ పిసిసి చీఫ్ బొత్సపై నిఘా పెట్టినట్టుగా తెలుస్తోంది. సత్తిబాబు అధికార పార్టీ ఎమ్మెల్యేలతో ఎవరెవరితో ముచ్చటిస్తున్నారు, ఏయే అధికారులతో సమావేశాలు జరుపుతున్నారు అనే విషయంపై తెలుసుకునేందుకు నిఘా పెట్టినట్లుగా తెలుస్తోంది. ప్రభుత్వం, పార్టీ వేరు కాదన్న బొత్స వ్యాఖ్యల్లో కూడా ముందుచూపు ఉన్నట్టుగా సిఎం భావిస్తున్నట్టు తెలుస్తోంది. అలా చెప్పడం ద్వారా ప్రభుత్వ కార్యక్రమాల్లో కూడా కాస్త తలదూర్చవచ్చనే ఉద్దేశ్యంతోనే బొత్స ఆ వ్యాఖ్యలు చేసినట్టుగా భావిస్తున్నారు.

అందుకే బొత్స ఏయే మంత్రులతో భేటీ అవుతున్నారనే విషయమే కాకుండా ఆయనకు సన్నిహితంగా మెలిగే మంత్రుల వివరాల విషయాలపై కూడా దృష్టి సారించినట్లు తెలుస్తోంది. అంతేకాదు వారితో బొత్స ఏం మాట్లాడుతున్నారో కూడా తెలుసుకునే ప్రయత్నాలు సిఎం చేస్తున్నట్టుగా తెలుస్తోంది. తద్వారా తనకు వచ్చే ఎన్నికల నాటికి పార్టీలో ఉన్న ఒక ప్రధాన ముఖ్యమంత్రి అభ్యర్థిని బలహీనపర్చవచ్చునని సిఎం భావిస్తున్నట్టుగా తెలుస్తోంది.

English summary

It seems, CM Kiran Kumar Reddy is concentrating on PCC chief Botsa Satyanarayana.