మీపై పోటీ పెట్టం, గెలిపిస్తాం: టి-కాంగ్రెసుకు టిఆర్ఎస్ బంపర్ ఆఫర్

By Srinivas

Published: Friday, June 17, 2011, 16:16 [IST]

హైదరాబాద్: తెలంగాణ కాంగ్రెసు పార్టీ ప్రజాప్రతినిధులకు తెలంగాణ రాష్ట్ర సమితి సిరిసిల్ల శాసనసభ్యుడు కల్వకుంట్ల తారక రామారావు శుక్రవారం బంపర్ ఆఫర్ ఇచ్చారు. పార్టీ అధిష్టానం నుండి తెలంగాణపై స్పష్టమైన హామీ లేనందున టి-కాంగ్రెసు నేతలు వెంటనే రాజీనామా చేయాలని డిమాండ్ చేశాడు. వారు రాజీనామా చేసి మళ్లీ పోటీకి దిగితే వారిపై టిఆర్ఎస్ నుండి పోటీ పెట్టమని స్పష్టం చేశారు. అయితే వారు కాంగ్రెసు పార్టీ నుండి బయటకు వచ్చి తెలంగాణ ఐక్య కార్యాచరణ సమితి తరఫున పోటీ చేయాలని ఆయన సూచించారు.

జెఏసి తరఫున పోటీ చేసి గెలిచి తెలంగాణ కోసం పోరాడాలని సూచించారు. అయితే అందుకోసం ముందు రాజీనామా చేయాలని డిమాండ్ చేశారు. ఊకదంపుడు ఉపన్యాసాలతో తెలంగాణ ప్రజలను మభ్య పెట్టవద్దని కోరారు. అయితే ఈసారి చివరి పర్యటన అంటూ వెళ్లిన వారు రాజీనామా చేస్తారని తాను భావిస్తున్నట్టు చెప్పారు.

Published On June 17, 2011