పుట్టపర్తిలో రతన్ టాటా: ట్రస్టు సభ్యులపై మాజీ మంత్రి నాగిరెడ్డి ధ్వజం

అనంతపురం: ప్రముఖ పారిశ్రామిక వేత్త రతన్ టాటా శుక్రవారం పుట్టపర్తి వచ్చారు. భగవాన్ శ్రీ సత్యసాయి బాబా నివశించిన యజుర్వేద మందిరంలోని ఆస్తులు లెక్కిస్తున్న సమయంలోనే రతన్ టాటా రావటం అందరిలోనూ ఆశ్చర్యాన్ని రేకెత్తించింది. పుట్టపర్తి చేరుకున్న టాటా ట్రస్టు కార్యదర్శి చక్రవర్తితో ప్రత్యేకంగా సమావేశం అయ్యారు. వారి భేటీకి మీడియాను అనుమతించలేదు. అంతేకాదు వారి దగ్గరకు రాబోయిన మీడియాపై చక్రవర్తి ఆగ్రహం వ్యక్తం చేశారు. పరిసర ప్రాంతాల్లో ఉండకూడదని హెచ్చరించారు.

కాగా భగవాన్ శ్రీ సత్యసాయిబాబా మరణంలోని మిస్టరీ ఏమిటో చెప్పాలని మాజీ మంత్రి నాగిరెడ్డి సత్యసాయి ట్రస్టు సభ్యులను డిమాండ్ చేశారు. యజుర్వేద మందిరంలో ఏం జరుగుతుందో రాష్ట్రంలోని ప్రజలందరికీ, బాబా భక్తులందరికీ తెలియాల్సిన అవసరం ఉందని ఆయన అన్నారు. ట్రస్టు సభ్యులపై ఆయన తీవ్రస్థాయిలో ధ్వజమెత్తారు. ట్రస్టు ఆస్తులను మీడియా ముందు లెక్కించాలని ఆయన అన్నారు. ప్రశాంతి నిలయం విషయంలో కేంద్ర ప్రభుత్వం జోక్యం చేసుకోవాలని ఆయన విజ్ఞప్తి చేశారు. కాగా బాబా ఆస్తులలో సౌదీ రాజులు సమర్పించిన భారీ కానుకలు ఉన్నట్లు తెలుస్తోంది. ఇరాన్, ఇరాక్, సౌదీకి చెందిన బాబా భక్తులు సమర్పించిన కానుకలు ఉన్నట్లుగా తెలుస్తోంది.

English summary

Ratan Tata in Puttaparthi