కార్యాలయాన్ని పేల్చేస్తాం: విహెచ్‌పి రాష్ట్ర ఆఫీసుకు బెదిరింపు కాల్స్

By Srinivas

Published: Friday, June 17, 2011, 15:29 [IST]

హైదరాబాద్: రాష్ట్ర రాజధాని హైదరాబాదులోని కోఠీలో ఉన్న విశ్వహిందూ పరిషత్ రాష్ట్ర కార్యాలయానికి శుక్రవారం మధ్యాహ్నం బెదిరింపు ఫోన్లు వచ్చాయి. బెదిరింపు ఫోన్లు మధ్యాహ్నం పన్నెండున్నర గంటల ప్రాంతంలో వచ్చాయి. ఫోన్ చేసిన అగంతకులు ఉర్దూ, హిందీలో కలిపి మాట్లాడారు. పది నిమిషాల వ్యవధిలో రెండుసార్లు ఫోన్ చేసి బెదిరించారు. విహెచ్‌పి వారు చాలా ఎక్కువ చేస్తున్నారని బాంబు పెట్టి పేల్చేస్తామంటూ ఆ అగంతకులు బిఎస్ఎన్ఎల్ ఫోన్ ద్వారా చేసి హెచ్చరించారు.

మొదటిసారి ఫోన్ చేసి హెచ్చరించినప్పుడు రాజశేఖర్ అనే కార్యకర్త ఫోన్ లిఫ్ట్ చేశాడు. అతనికి హిందీ, ఉర్దూ రాక పోవడంతో రెండోసారి ఉర్దూ వచ్చిన మరో కార్యకర్త ఫోన్ లిఫ్ట్ చేశాడు. దీంతో అప్రమత్తమైన కార్యకర్తలు పోలీసులకు సమాచారం అందించారు. సమాచారం అందుకున్న బాంబు నిర్వీర్య బృందం రంగంలోకి దిగింది. కార్యాలయంలో తనిఖీలు నిర్వహించింది. బాంబు బెదిరింపు నేపథ్యంలో వీహెచ్‌పీ కార్యాలయం చుట్టుపక్కల దుకాణాలను పోలీసులు మూసివేయించారు.

Published On June 17, 2011