తెలంగాణను చంద్రబాబు అడ్డుకున్నారు!: టిడిపి ఎమ్మెల్యే బోడ

By Srinivas

Published: Saturday, June 18, 2011, 14:38 [IST]

హైదరాబాద్: 2009 డిసెంబర్ 9న కేంద్ర ప్రభుత్వం ప్రత్యేక తెలంగాణ రాష్ట్ర ప్రకటిస్తే తెలుగుదేశం పార్టీ అధ్యక్షుడు నారా చంద్రబాబునాయుడు అడ్డుకున్నాడనే భావన తెలంగాణ ప్రజల్లో ఉందని ఆ భావనను తొలగించాలంటే చంద్రబాబు కేంద్రానికి మరో మారు తెలంగాణకు మద్దతు ఇస్తూ లేఖను అందించడమే కాకుండా మహానాడులో తీర్మానం చేయాలని తాము డిమాండ్ చేస్తున్నామని ఆ పార్టీ ఎమ్మెల్యే బోడ జనార్దన్ ఓ టీవీ ఇంటర్వ్యూలో చెప్పారు. తనకు షోకాజ్ నోటీసులు ఇవ్వకుండా తనను ఎలా సస్పెండ్ చేస్తారని ఆయన ప్రశ్నించారు.

టిడిపి నుండి సస్పెండ్ అయిన వారమంతా సమావేశం అయి భవిష్యత్తు కార్యాచరణపై నిర్ణయం తీసుకుంటామని చెప్పారు. తెలంగాణలోని పది జిల్లాలో తనలాంటి వారున్నారన్నారు. తాను టిడిపి బహిష్కృత శాసనసభ్యుడు నాగం జనార్దన్ రెడ్డితో ఎప్పుడూ తిరగలేదన్నారు. నాగర్ కర్నూల్ సభ పార్టీలకతీతంగా జరిగిందని అందుకే పాల్గొన్నానని చెప్పారు. ఒకవేళ పార్టీ తనకు పాల్గొనవద్దని చెప్పినా ఊరుకునే వాణ్ణని అన్నారు. నేనెప్పుడూ పార్టీకి వ్యతిరేకంగా పని చేయలేదన్నారు. తాను తెలంగాణ వాదం వినిపించినందుకే తనపై వేటు వేశారని అన్నారు.

Published On June 18, 2011