నీరజ సమస్య చిన్నది, జగన్ వర్గానికి బ్రేకులు: చీఫ్ బొత్స, టిజి

By Srinivas

Published: Saturday, June 18, 2011, 12:37 [IST]

హైదరాబాద్‌: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వర్గం వెంట వెళుతున్న కాంగ్రెసు శాసనసభ్యులకు ఇక ముందు బ్రేక్ పడుతుందని చిన్న నీటి పారుదల శాఖ మంత్రి టిజి వెంకటేష్ శనివారం అన్నారు. జగన్ వెంట వెళుతున్న వారిపై ఇక ముందు తీవ్ర పరిణామాలు ఉంటాయన్నారు. కర్నూలు జిల్లా ఆలూరు శాసనసభ్యురాలు నీరజారెడ్డిది ఆవేదన మాత్రమే అన్నారు. నియోజకవర్గాల పునర్విభజన వల్లనే ఈ సమస్యలు తలెత్తాయని అవి సమసి పోతాయని అన్నారు.

కాగా తనకు రాజీనామా సమర్పించిన నీరజారెడ్డి వ్యహారం త్వరలోనే సమసిపోతుందని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ వేరుగా అన్నారు. విజయనగరం జిల్లాకు బయలుదేరే ముందు బొత్స ఆయన మీడియాతో మాట్లాడారు. నీరజారెడ్డిది చిన్న సమస్య అన్నారు. కుటుంబంలో ఇలాంటి చిన్నపాటి సమస్యలు తలెత్తడం సహజమన్నారు. ఆమెది స్థానిక సమస్య అని దానిని పరిష్కరించమని జిల్లా మంత్రికి చెప్పానని, ఆ సమస్య రెండు రోజుల్లో సమసి పోతుందని ఆయన అన్నారు.

Published On June 18, 2011