తెలంగాణపై అభిప్రాయం చెబుతా, లగడపాటి వ్యాఖ్యలు సరికాదు: దానం

By Srinivas

Published: Sunday, June 19, 2011, 13:36 [IST]

హైదరాబాద్: ప్రత్యేక తెలంగాణ రాష్ట్రంపై తన అభిప్రాయం త్వరలో చెబుతానని కార్మిక శాఖ మంత్రి దానం నాగేందర్ ఆదివారం విలేకరులతో మాట్లాడుతూ స్పష్టం చేశారు. విజయవాడ పార్లమెంటు సభ్యుడు లగడపాటి రాజగోపాల్ చేసిన వ్యాఖ్యలను ఆయన ఖండించారు. తెలంగాణ వస్తే మతకలహాలు జరుగుతాయనటంలో నిజం లేదన్నారు. కెసిఆర్, లగడపాటి వంటి వారు తెలంగాణ ప్రజలు రోడ్ల పైనే ఉండాలని కోరుకుంటున్నారా అని ప్రశ్నించారు. ఢిల్లీ వెళ్లిన తెలంగాణ నేతలు సాధించేదేమిటన్నారు.

కాగా సికింద్రాబాద్ పార్లమెంటు సభ్యుడు అంజన్ కుమార్ యాదవ్ కూడా లగడపాటి వ్యాఖ్యలను ఖండించారు. ప్రజలంతా తెలంగాణ కోరుకుంటున్నారన్నారు. అధిష్టానం ఆమోదయోగ్యమైన నిర్ణయం త్వరలో తీసుకుంటుందని ఆయన అభిప్రాయపడ్డారు. వంటావార్పు జెఏసి కార్యక్రమం అన్నారు. హైదరాబాదు ప్రాంతంలో పాత రోజులు ఎప్పుడూ రావన్నారు. హిందూ ముస్లింలు కలిసే ఉంటారన్నారు.

Published On June 19, 2011