లగడపాటికి తెలివి లేదు, ఆయనో బ్రోకర్: బండారు దత్తాత్రేయ

By Srinivas

Published: Sunday, June 19, 2011, 14:46 [IST]

హైదరాబాద్: విజయవాడ పార్లమెంటు సభ్యుడు లగడపాటి రాజగోపాల్‌కు తెలివి లేదని ఆయనో బ్రోకర్ అని ఆదివారం వంటావార్పు కార్యక్రమంలో పాల్గొన్న భారతీయ జనతా పార్టీ మాజీ రాష్ట్ర అధ్యక్షుడు బండారు దత్తాత్రేయ విమర్శించారు. ఎన్నికలు వస్తే కాంగ్రెసు 245 సీట్లు కాదని 45 సీట్లు కూడా రావన్నారు. తెలంగాణకు మద్దతు పలకకుంటే కాంగ్రెసు నేతలను తెలంగాణలో తిరగనివ్వమని హెచ్చరించారు. తెలంగాణపై కాంగ్రెసు అధికారికంగా వైఖరి చెప్పాలని అన్నారు. టెంటు వేయడానికి పోలీసులు అనుమతించడం లేదని ఆలా చేస్తే అధికార కాంగ్రెసుకు తెలంగాణలో టెంటు ఉండదన్నారు.

శాంతియుతంగా వంటావార్పు జరుగుతుందన్నారు. తెలంగాణకు అన్ని పార్టీలు సహకరించాలన్నారు. పోలీసులు కొన్ని చోట్ల అడ్డుకునే ప్రయత్నాలు చేస్తున్నారని అలా చేస్తే వారిని దిగ్బంధిస్తామని హెచ్చరించారు. తెలంగాణపై ఎలాంటి గడువులు తాము ఆమోదించేది లేదని మరో నేత విద్యాసాగర్ రావు అన్నారు. తెలంగాణ వస్తే తెలంగాణ వారు దుబాయ్ వెళ్లవలసిన అవసరం ఉండదన్నారు. తెలంగాణే ఓ దుబాయ్‌లా మారుతుందన్నారు.

Published On June 19, 2011