తెలంగాణ కోసం రాజీనామాకు సిద్ధం: పిజెఆర్ తనయుడు విష్ణువర్దన్

By Srinivas

Published: Sunday, June 19, 2011, 14:26 [IST]

హైదరాబాద్: ప్రత్యేక తెలంగాణ రాష్ట్రం కోసం శాసనసభ్యత్వానికి రాజీనామా చేయడానికి తాను సిద్ధంగా ఉన్నానని జూబ్లీహిల్స్ ఎమ్మెల్యే పి.విష్ణువర్దన్ రెడ్డి ఆదివారం అన్నారు. తెలంగాణ ఐక్య కార్యాచరణ సమితి పట్నం రోడ్లపై పొయ్యి పెడతాం కార్యక్రమంలో భాగంగా ఆయన హైటెక్ సిటీ వంటావార్పులో పాల్గొన్నారు. ఈ సందర్భంగా ఆయన విలేకరులతో మాట్లాడారు. తన తండ్రి పి.జనార్దన్ రెడ్డి తెలంగాణ కోసం, జివో 16 ఎత్తివేత కోసం, పోతిరెడ్డి పాడుపై అలుపెరగని పోరాటం చేశారని అన్నారు.

తాను కూడా తన తండ్రి బాటలో తెలంగాణ కోసం పోరాటం చేస్తానని చెప్పారు. పార్టీలకతీతంగా అందరూ జెండాలు పక్కన పెట్టి తెలంగాణ కోసం ఉద్యమించాలని అన్నారు. తెలంగాణ కోసం హైదరాబాద్ యువకులు బయటకు రావాలన్నారు. కాగా కార్యక్రమంలో టిఆర్ఎస్ ఎమ్మెల్యే హరీష్ రావు వంటావార్పులో భాగంగా విష్ణుకు తినిపించారు.

Published On June 19, 2011