రష్యాలో విమానం కూలి 44 మంది ప్రయాణికులు దుర్మరణం

మాస్కో: రష్యాలో జరిగిన విమాన ప్రమాదంలో 44 మంది మరణించారు. మరో 8 మంది పరిస్థితి ఆందోళనకరంగా ఉంది. మాస్కో నుంచి బయలుదేరిన విమానం కరేలియా రిపబ్లిక్‌లోని పెట్రొజావెడిస్క్‌ వెళ్లాల్సి ఉంది. అయితే దాదాపు విమానాశ్రయం దగ్గరవరకూ వెళ్లిన రష్ ఎయిర్ తూ -134 విమానం దిగబోతూ హఠాత్తుగా కూలింది. కూలిన వెంటనే మంటలు అంటుకుని కాలిపోయింది. విమానంలో 43 మంది ప్రయాణికులు, 9 మంది సిబ్బంది ఉన్నారు. ప్రమాద వివరాలను అధికార వర్గాలు మంగళవారం వెల్లడించాయి.

రవాణా నిబంధనలను నిర్లక్ష్యం చేయడంపై క్రిమినల్ దర్యాప్తు జరిపిస్తున్నట్లు రష్యా దర్యాప్తు కమిటీ అధికార ప్రతినిధి వ్లదిమీర్ మార్కిన్ చెప్పారు. విమానంలోని ప్రయాణికుల జాబితాను మాస్కోలోని ఎమర్జెన్సీస్ మంత్రిత్వ శాఖ అందజేసింది. కాగా, కరేలియా మంత్రిత్వ శాఖ బతికి బయటపడ్డ ఎనిమిది మంది జాబితాను వెల్లడించింది. విమాన ప్రమాదానికి గల కారణాలు తెలియరాలేదు. వాతావరణం బాగా లేకపోవడం పల్లనే ప్రమాదం జరిగి ఉంటుందని 24 గంటల న్యూస్ చానెల్ వెస్టీ ఏవియేషన్ వర్గాలను ఉటంకిస్తూ ఓ వార్తాకథనాన్ని ప్రసారం చేసింది.

English summary

Forty four people were killed and eight survived with serious injuries when a Russian passenger plane crashed onto a motorway before landing, leaving bodies strewn over the road, officials said on Tuesday.