యువకునిపై దేవినేని సోదరుడి దౌర్జన్యం, అవమానంతో ఆత్మహత్యయత్నం!

విజయవాడ: బెజవాడ కాంగ్రెసు పార్టీ సీనియర్ శాసనసభ్యుడు, మాజీ మంత్రి దేవినేని నెహ్రూ సోదరుడు బాజీ ప్రసాద్ ఓ యువకుడిపై మంగళవారం దౌర్జన్యానికి దిగారు. కాట్రేనిపాడుకు చెందిన రాజు అనే యువకుడిపై బాజిప్రసాద్ దాడి చేశారు. ఈ దాడిలో రాజు కొద్దిగా గాయపడ్డాడు. అయితే ఎమ్మెల్యే సోదరుడు తనపై అమానుషంగా దాడి చేయడంతో తీవ్ర మనస్తాపానికి గురైన రాజు ఆత్మహత్యాయత్నానికి పాల్పడ్డాడు. అయితే గమనించిన స్థానికులు రాజును స్థానిక హాస్పిటల్‌కు తరలించారు.

రాజుకు ఎలాంటి ప్రమాదం లేదని వైద్యులు చెప్పారు. ఆయనకు చికిత్స చేస్తున్నారు. కాగా రాజుపై ఎమ్మెల్యే సోదరుడి దాడిని నిరసిస్తూ ముసునూరు పోలీసు స్టేషన్‌లో బాజి ప్రసాద్‌పై ఎస్సీ, ఎస్టీ సెక్షన్ల కింద్ కేసు పెట్టారు. పోలీసులు కేసు నమోదు చేసుకొని విచారణ జరుపుతున్నారు.

English summary

Congress MLA Devineni Nehru relative Baji Prasad attack on candidate in Katrenipadu of Vijayawada. Raju was tried for suicide and sent to hospital.