జైపాల్ రెడ్డి కోడలు కిరణ్‌ రెడ్డికి భర్తతో నిత్యం వేధింపులే!: విచారణలో వెల్లడి

By Srinivas

Published: Thursday, June 23, 2011, 16:54 [IST]

హైదరాబాద్: ఇటీవల హత్యకు గురైన కేంద్రమంత్రి జైపాల్ రెడ్డి మేనకోడలు కిరణ్ రెడ్డిని ఆమె భర్త చైతన్య రెడ్డి నిత్యం వేధించే వాడని విచారణలో వెల్లడయింది. కిరణ్ రెడ్డి, చైతన్య రెడ్డిలది ప్రేమ వివాహం కావడం మరో విశేషం. ప్రేమ వివాహం చేసుకున్న చైతన్య తన భార్యను మద్యం మత్తులో చంపేయడం బాధాకరం. అమెరికాలో డాక్టర్ చదవిని కిరణ్ రెడ్డి అపోలో హాస్పిటల్ వైద్యురాలిగా పని చేస్తోంది. ఆమె భర్త చైతన్య రెడ్డి కూడా అమెరికాలో మెడిసిన్ చదివాడు. వివాహం అనంతరం కిరణ్‌ను చైతన్య నిత్యం వేధించే వాడంట. ఓ ఉద్యోగంలో కుదురుగా ఉండే వాడు కాదంట. ఎప్పుడూ ఉద్యోగాలు మార్చడం లేదా ఉద్యోగం చేయకుండా ఉండటం చేసే వాడంట.

కిరణ్ పేర ఉన్న ఆస్తిని తన పేర రాయమని ఆమెను నిత్యం వేధించే వాడంట. నిలకడలేని చైతన్య ఆ తర్వాత మద్యానికి బానిసయ్యాడు. రోజూ మద్యం తాగి వచ్చి కిరణ్ రెడ్డిని వేధించే వాడు. ఆస్తి విషయంలో నిత్యం ఆమెతో తగాదా పడే వాడని తెలుస్తోంది. ఆరు రోజుల క్రితం కూడా మద్యం తాగి వచ్చిన చైతన్య ఆ మద్యం మత్తులో కిరణ్ రెడ్డిని చంపేసి సహజ మరణంగా చిత్రించే ప్రయత్నాలు చేశాడు. చైతన్య నిలకడలేమి కారణంగా కిరణ్ కూడా పలుమార్లు చైతన్యను హెచ్చరించింది. కానీ చైతన్య తన పద్దతి మాత్రం మార్చుకోలేదు. కాగా ఈ నెల 26న కిరణ్ రెడ్డి సోదరుడు సునీల్ వివాహం ఉంది. అయితే వివాహానికి పది రోజుల ముందే కిరణ్ హత్య ఆ కుటుంబంలో విషాదాన్ని నింపింది. కాగా చైతన్యకు కోర్టు 14 రోజుల రిమాండ్ విధించింది.

Published On June 23, 2011