అంతొద్దు కానీ రాజీనామా చేయండి: టి-ఎంపీలకు జీవన్ రెడ్డి సూచన

By Srinivas

Published: Monday, June 27, 2011, 15:17 [IST]

హైదరాబాద్: తెలంగాణ ప్రాంత కాంగ్రెసు పార్టీ పార్లమెంటు సభ్యులు తెలంగాణ కోసం ప్రాణత్యాగం చేయాల్సి అవసరం లేదని తమ పదవులకు రాజీనామా చేస్తే చాలని కాంగ్రెసు పార్టీ సీనియర్ నాయకుడు జీవన్ రెడ్డి టి-ఎంపీలకు సూచించారు. సోమవారం జీవన్ రెడ్డి ఎమ్మెల్సీ యాదవరెడ్డితో కలిసి విలేకరులతో మాట్లాడారు. తెలంగాణ అంశాన్ని పక్కదారి పట్టించడానికే కేంద్రం, రాష్ట్ర ప్రభుత్వాలు కుట్ర పన్ని 14ఎఫ్‌ను తెరపైకి తీసుకు వచ్చాయని ఆరోపించారు. తెలంగాణ కోసం టి-కాంగ్రెసు నేతలు రాజీనామా చేయాల్సిందేనని డిమాండ్ చేశారు. అందుకు మరో ప్రత్యామ్నాయం లేదని అన్నారు.

ఏడాదిన్నర క్రితం శాసనసభలో తెలంగాణపై తీర్మానం చేశారని కానీ ఇప్పటి వరకు ఎలాంటి పురోగతి లేక పోవడం విచారకరమన్నారు. వచ్చే జూలై 1వ తేదిన తెలంగాణ కాంగ్రెసు ప్రజాప్రతినిధులం సమావేశం అవుతామని అన్నారు. ఎగ్జిబిషన్ గ్రౌండ్స్‌లో సమావేశమై భవిష్యత్తు ప్రణాళిక నిర్ణయిస్తామని చెప్పారు. ఆ రోజే రాజీనామాలపై కీలక నిర్ణయం తీసుకుంటామని చెప్పారు.

Published On June 27, 2011