విద్యుత్ శాఖకు రూ.కోటి బకాయి, మాచర్లలో వెలగని వీధిలైట్లు

గుంటూరు: జిల్లాలోని మాచర్ల మున్సిపాలిటీ బకాయిలు చెల్లించక పోవడంతో విద్యుత్ అధికారులు విద్యుత్ నిలిపి వేసిన విచిత్ర సంఘటన చోటు చేసుకుంది. మాచర్ల మున్సిపాలిటీ తమ బకాయిలతో పాటు ప్రస్తుత బిల్లులు చెల్లించలేదని విద్యుత్ శాఖ మూడు రోజుల క్రితం మాచర్ల పట్టణానికి విద్యుత్ నిలిపి వేసింది. వీధి లైట్లు వెలగక పోవడంతో మూడు రోజులుగా మాచర్ల పట్టణం అంధకారంలో మగ్గిపోతుంది. తమ వద్ద డబ్బులు లేక పోవడం వల్లనే బకాయిలు కట్టడం లేదని మున్సిపల్ అధికారులు చెబుతున్నారు. సుమారు ఒక కోటి ముప్పై లక్షల రూపాయల వరకు బాకీ ఉన్నట్లుగా తెలుస్తోంది.

మాచర్ల మున్సిపాలిటి కేవలం విద్యుత్ అధికారులకు మాత్రమే బకాయి పడలేదు. స్థానికంగా ఉన్న ఓ పెట్రోలు బంకుకు కూడా బకాయిలు చెల్లించక పోవడంతో వారు చెత్త ఎత్తే వాహనాలకు పెట్రోలు పోయడం లేదు. దీంతో మాచర్ల వీధుల్లో చెత్త పేరుకు పోయింది. ఇటు విద్యుత్ లేక అటు చెత్త పేరుకు పోయి మాచర్ల ప్రజలు తీవ్ర ఇబ్బందులకు గురవుతున్నారు.

English summary

Macharla municipality have no current due to Fee dues to AP genco.