సినిమాలకు మెగాస్టార్ చిరంజీవి గుడ్‌బై

By Pratap

Published: Tuesday, June 28, 2011, 21:56 [IST]

హైదరాబాద్: ప్రజారాజ్యం పార్టీ అధ్యక్షుడు, మెగాస్టార్ చిరంజీవి సంచలన ప్రకటన చేశారు. తన 150 చిత్రం పూర్తి చేయకుండానే ఆయన సినీ రంగానికి గుడ్‌బై చెప్పారు. సినీరంగం నుంచి ఆయన విరమణ ప్రకటించారు. తన నటవారసుడు ఇక తన కుమారుడు రామ్ చరణ్ తేజనే అని ఆయన చెప్పారు. ఓ టీవీ చానెల్ కార్యక్రమంలో ఆయన ఈ విషయం చెప్పారు. ఇక సినిమాల్లో ముఖ్యమంత్రిగా నటించాల్సిన అవసరం లేదని, నిజ జీవితంలో ముఖ్యమంత్రిగా జీవించే అవకాశం వచ్చినప్పుడు ఆ అవసరం లేదని ఆయన అన్నారు. ఇక సినిమాల్లో నటించబోనని, రాజకీయాల్లోనే కొనసాగుతానని ఆయన చెప్పారు.

సేవా మార్గంలోకి వచ్చిన తర్వాత సినిమాల్లో నటించడం భావ్యం కాదని ఆయన అన్నారు. ప్రజలు తనను ముఖ్యమంత్రిగా చూడాలని అనుకుంటున్నట్లు ఆయన తెలిపారు. సినిమాల్లో కన్నా నిజ జీవితంలో ముఖ్యమంత్రిగా పనిచేయడం సౌకర్యంగా ఉంటుందని ఆయన అన్నారు. ఇక పూర్తి కాలం రాజకీయాల్లో కొనసాగుతానని ఆయన అన్నారు. చిరంజీవి ప్రకటనకు సినీ రంగం తీవ్ర దిగ్భ్రాంతిని వ్యక్తం చేసింది. సినిమాలకు చిరంజీవి రిటైర్మైంట్ ప్రకటించడం బాధాకరమని ప్రముఖ నిర్మాత అశ్వినీదత్ అన్నారు. 150వ చిత్రంలో నటించాలని తాను చిరంజీవిని కోరుతానని చిన్ని కృష్ణ అన్నారు. చిరంజీవి ప్రకటనను బట్టి కాంగ్రెసు అధిష్టానం చిరంజీవిని ముఖ్యమంత్రి అభ్యర్థిగా ముందుకు తెస్తున్నట్లు అర్థమవుతోంది.

Published On June 28, 2011