తెలంగాణ టిడిపి ఎమ్మెల్యేలూ రాజీనామాలకు రెడీ

హైదరాబాద్: రాష్ట్ర సాధన కోసం తెలుగుదేశం తెలంగాణ శాసనసభ్యులు కూడా సిద్ధపడ్డారు. తెలంగాణ రాష్ట్ర సాధన కోసం తాము రాజీనామా చేస్తామని తెలుగుదేశం తెలంగాణ ఫోరం కన్వీనర్ ఎర్రబెల్లి దయాకర్ రావు చెప్పారు. ఈ నెల 3వ తేదీన తాము సమావేశమై తుది నిర్ణయం తీసుకుంటామని ఆయన శుక్రవారం మీడియా ప్రతినిధుల సమావేశంలో అన్నారు. ఈ నెల 4వ తేదీన తాము స్పీకర్‌కు రాజీనామాలు చేస్తామని ఆయన చెప్పారు. కాంగ్రెసు తెలంగాణ ప్రజాప్రతినిధుల రాజీనామాల నిర్ణయాన్ని తాము స్వాగతిస్తున్నట్లు ఆయన తెలిపారు. తెలంగాణ వచ్చే వరకు జెండాలు, ఎజెండాలు పక్కన పెట్టాలని ఆయన అన్నారు.

రాజీనామాలు చేయాలనే కాంగ్రెసు ప్రజాప్రతినిధుల నిర్ణయాన్ని స్వాగతిస్తున్నట్లు తెలంగాణ జెఎసి కన్వీనర్ కోదండరామ్ చెప్పారు. రాజకీయ సంక్షోభం సృష్టించడం ద్వారా తెలంగాణ రాష్ట్రాన్ని సాధించుకోగలుగుతామని ఆయన అన్నారు. కాంగ్రెసు ప్రజాప్రతినిధులు వెనక్కి తగ్గకూడదని ఆయన అన్నారు. కాంగ్రెసు తెలంగాణ ప్రజాప్రతినిధుల నిర్ణయాన్ని స్వాగతిస్తున్నట్లు తెలంగాణ రాష్ట్ర సమితి శానససభా పక్ష నేత ఈటెల రాజేందర్ తెలిపారు. కాంగ్రెసు నాయకులు తమ మాటకు కట్టుబడి ఉండాలని ఆయన అన్నారు.

English summary

TDP Telangana MLAs are ready to resign to achieve Telangana state. TDP Telangana forum convenor Errabelli Dayakar Rao revealed this.