రాజీనామాలకు చిరు సరేనన్నారు: ఎమ్మెల్యే మహేశ్వర్ రెడ్డి

By Pratap

Published: Sunday, July 3, 2011, 19:15 [IST]

హైదారాబాద్‌: తెలంగాణ కోసం రాజీనామాలు చేయడానికి తమ పార్టీ అధ్యక్షుడు చిరంజీవి అంగీకరించినట్లు తెలంగాణ ప్రాంత ప్రజారాజ్యం పార్టీ శాసనసభ్యుడు మహేశ్వర్ రెడ్డి చెప్పారు. నిజామాబాద్ జిల్లా బాల్కొండ శాసనసభ్యుడు కూడా అదే మాట చెప్పారు. చిరంజీవి అనుమతితోనే తాను రాజీనామా చేయడానికి సిద్ధపడుతున్నట్లు అనిల్ తెలిపారు. చిరంజీవి తెలంగాణకు అనుకూలంగా ఉన్నారని ఆయన అన్నారు. ఉప ఎన్నికలు వచ్చే విధంగా కాకుండా రాజకీయ సంక్షోభానికి దారి తీసే విధంగా ఎక్కువ మంది శానససభ్యులు రాజీనామాలు చేస్తే తాను రాజీనామా చేస్తానని మహేశ్వర రెడ్డి ఆదివారం మీడియా ప్రతినిధుల సమావేశంలో చెప్పారు.

కాంగ్రెసుకు చెందిన కనీసం 30 మంది తెలంగాణ శాసనసభ్యులు రాజీనామాలు చేస్తే తాను రాజీనామా చేస్తానని ఆయన అన్నారు. రాజీనామా విషయంలో వెనక్కి వెళ్లే ప్రసక్తి లేదని ఆయన చెప్పారు. రాజకీయ సన్యాసానికైనా దానికి సిద్ధంగా ఉన్నానని ఆయన అన్నారు. కొద్ది మంది రాజీనామాలు చేయడం వల్ల ఉప ఎన్నికలు వస్తున్నాయని, ఉప ఎన్నికల్లో పాతవారే పోటీ చేసి భారీ మెజారిటీతో గెలుస్తున్నారని, దాని వల్ల తెలంగాణ రాష్ట్ర సాధన సాధ్యం కాదని ఆయన అన్నారు. తాము రాజీనామాలు చేస్తున్నట్లు చిరంజీవికి చెప్పామని, చిరంజీవి స్వాగతించారని ఆయన అన్నారు.

Published On July 3, 2011