కెసిఆర్ రాజీనామాకు కొండా సురేఖ డిమాండ్

By Srinivas

Published: Monday, July 4, 2011, 10:51 [IST]

హైదరాబాద్: ప్రత్యేక తెలంగాణ రాష్ట్ర సాధన కోసం తెలంగాణ రాష్ట్ర సమితి పార్లమెంటు సభ్యులు కల్వకుంట్ల చంద్రశేఖర రావు, విజయశాంతి రాజీనామా చేయాలని వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి క్యాంప్ కాంగ్రెసు పార్టీ శాసనసభ్యురాలు కొండా సురేఖ సోమవారం అసెంబ్లీ మీడియా పాయింట్ వద్ద మాట్లాడుతూ డిమాండ్ చేశారు. రాజీనామాల నుండి తెలంగాణకు కట్టుబడి ఉన్న బిజెపి, టిఆర్ఎస్ ఎమ్మెల్యేలను మినహాయిస్తున్నట్టు చెప్పారు. టిఆర్ఎస్ ఎమ్మెల్యేలు రాజీనామా చేసిన సమయంలో ఎంపీలు రాజీనామా చేయనందునే తాను డిమాండ్ చేస్తున్నట్లు చెప్పారు. కోదండరామ్ ఇప్పటికైనా టిఆర్ఎస్ ముద్ర తొలగించుకొని రాజీనామా చేసిన శాససనభ్యులతో సమన్వయం చేస్తారని తాను భావిస్తున్నానని అన్నారు. కాంగ్రెసు పార్టీ ఇప్పటికే రాష్ట్రంలో భూస్థాపితం అయిపోయిందన్నారు. కాంగ్రెసు రాజీనామాలు ఆమోదించకుండా మిగిలిన శాసనసభ్యుల రాజీనామాలు ఆమోదించే కుతంత్రాలకు కాంగ్రెసు పోకూడదన్నారు.

కొన ఊపిరితో ఉన్న కాంగ్రెసు కనీసం తెలంగాణలోనైనా కనుమరుగు కాకుండా ఉండాలంటే హైకమాండ్ వెంటనే తెలంగాణ ప్రకటించాలని డిమాండ్ చేశారు. టి-కాంగ్రెసు నేతలు రాజీనామాలు చేసి ఆమోదింప జేసుకునే వరకు రాజీనామాలపై అనుమానమే అని ఆమె అభిప్రాయపడ్డారు. తనపై కాంగ్రెసు పార్టీకి చర్యలు తీసుకునే నైతిక హక్కు లేదన్నారు. జగన్ ప్లీనరీలో తెలంగాణపై తన వైఖరి ప్రకటిస్తారని చెప్పారు. తన రాజీనామాకు జగన్ నుండి అనుమతి తీసుకోవాల్సిన అవసరం లేదన్నారు. జగన్ తమకు భావస్వేచ్ఛ ఇచ్చాడని అన్నారు. కాగా కొండా సురేఖ తన రాజీనామా పత్రాన్ని డిప్యూటీ స్పీకర్‌కు సమర్పించారు. తన రాజీనామాను వెంటనే ఆమోదించాలని అన్నారు.

Published On July 4, 2011