తెలంగాణ రాజీనామాలపై లగడపాటి నో కామెంట్

By Srinivas

Published: Monday, July 4, 2011, 14:00 [IST]

విజయవాడ/ నెల్లూరు‌: తెలంగాణ ప్రజాప్రతినిధుల రాజీనామాలపై స్పందించడానికి కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ నిరాకరించారు. తాను ఇప్పుడు ఏమీ మాట్లాడబోనని ఆయన విజయవాడలో సోమవారం మీడియా ప్రతినిధులతో అన్నారు. రాజీనామాలపై సరైన సమయంలో సరైన వేదిక మీద స్పందిస్తానని ఆయన చెప్పారు. తాను సమైక్యవాదాన్ని మరోసారి వినిపిస్తానని ఆయన చెప్పారు. తెలంగాణ ప్రజాప్రతినిధుల రాజీనామాలపై తాను పార్టీ అధిష్టానానికి తన అభిప్రాయాన్ని చెప్తానని ఆయన అన్నారు.

తెలంగాణ ప్రజాప్రతినిధుల రాజీనామాల వల్ల కేంద్ర, రాష్ట్ర ప్రభుత్వాల మనుగడకు ఏ విధమైన డోకా లేదని కేంద్ర మంత్రి పనబాక లక్ష్మి అన్నారు. ప్రభుత్వాలు కొసాగుతాయని ఆమె సోమవారం మీడియా ప్రతినిధులతో అన్నారు. వారి రాజీనామాలను ఆమోదించిన తర్వాత ఉన్నవారే లెక్కకు వస్తారు కాబట్టి ప్రభుత్వాలు పడిపోవని ఆమె అన్నారు. తెలంగాణపై అందరు కూడా తమ కాంగ్రెసు పార్టీ అధిష్టానం నిర్ణయానికి కట్టుబడి ఉండాలని ఆమె అన్నారు.

Published On July 4, 2011