పార్లమెంటులో ఆత్మహత్య చేసుకుంటా: ఎంపి సర్వే

న్యూఢిల్లీ: తెలంగాణ రాష్ట్రం ఇవ్వాలని డిమాండ్ చేస్తూ తమ పార్టీ ప్రజాప్రతినిధులు రాజీనామా చేయడాన్ని కాంగ్రెసు తెలంగాణ ప్రాంత లోకసభ సభ్యుడు సర్వే సత్యనారాయణ వ్యతిరేకించారు. తెలంగాణ కోసం తాను పార్లమెంటులో ఆత్మహత్య చేసుకుంటానని ఆయన సోమవారం మీడియా ప్రతినిధులతో అన్నారు. రాజీనామాలు చేయడం వల్ల తెలంగాణ కోసం పోరాడలేమని ఆయన అన్నారు. పదవులకు రాజీనామాలు చేస్తే తెలంగాణ కోసం పోరాటం చేసేది ఎవరని ఆయన అడిగారు.

పదవులు లేకుంటే ఏమీ సాధించలేమని ఆయన అభిప్రాయపడ్డారు. తెలంగాణకు కాంగ్రెసు పార్టీ అధిష్టానం వ్యతిరేకం కాదని ఆయన చెప్పారు. తమ పార్టీ అధ్యక్షురాలు సోనియా గాంధీ నిర్ణయం తెలంగాణపై తొలుత వెలువడాల్సి ఉందని, సోనియా నిర్ణయం వెలువడకుండా రాజీనామాలకు సిద్ధపడడం సరైన చర్య కాదని ఆయన అన్నారు. అన్నం పెట్టిన సోనియాకు సున్నం పెట్టడం మంచిది కాదని ఆయన అన్నారు. తెలంగాణ కోసం రాజీనామా చేయడానికి ఆయన నిరాకరించారు. మిగతా పార్లమెంటు సభ్యులతో ఆయన రాజీనామా చేయలేదు.

English summary

Congress Telangana region Loksabha member Survey Satyanarayana opposed his party mps decision of resignations.