రాజీనామా చేసినా మంత్రులుగా కొనసాగుతారా?

By Srinivas

Published: Monday, July 4, 2011, 15:43 [IST]

హైదరాబాద్: శాసనసభ్యత్వానికి రాజీనామా చేసిన తెలంగాణ ప్రాంత మంత్రులు తమ పోర్టుపోలీయోలకు రాజీనామా చేయకపోవడంపై తెలంగాణవాదుల్లో అనుమానాలు తలెత్తుతున్నాయి. కాంగ్రెసు పార్టీ శాసనసభ్యులతో పాటు తమ రాజీనామా పత్రాలను ఉప సభాపతి మల్లు భట్టి విక్రమార్కకు అంద జేసిన తెలంగాణ మంత్రులు అక్కడితో చేతులు దులుపుకున్నారు. కేవలం శాసనసభ్యత్వానికి మాత్రమే రాజీనామా చేసి తెలంగాణ ప్రజల్లో ప్రత్యేక రాష్ట్రం కోసం రాజీనామా చేశామనే భావన కలిగించారని అనిపిస్తోంది. వారు కేవలం ఎమ్మెల్యే పదవులకు మాత్రమే రాజీనామా చేసి మంత్రి పదవులకు రాజీనామా చేయలేదు. రాజీనామా విషయం ఈ నెల 1నే నిర్ణయించుకున్నప్పటికీ మంత్రులు గవర్నర్ అపాయింటుమెంటు కోరలేదు.

మంత్రులు తమ రాజీనామాలు గవర్నర్‌కు ఇవ్వవలసి ఉంటుంది. కానీ వారు గవర్నర్ అపాయింటుమెంటు కోరలేదు. గవర్నర్ కార్యాలయ వర్గం కూడా అదే చెబుతోంది. ఎమ్మెల్యే పదవితో పాటు మంత్రి పదవికీ రాజీనామా చేయాలనుకుంటే వారు అప్పుడే గవర్నర్‌కు రాజీనామా సమర్పించాల్సిన అవసరం ఉంది. కాని వారు అలా చేయలేదు. ఎమ్మెల్యే పదవి లేకున్నప్పటికీ మంత్రిగా ఆరు నెలలు కొనసాగే అవకాశం ఉంది. అందుకే వారు రాజీనామా చేయనట్టుగా తెలంగాణవాదులు భావిస్తున్నారు. రాజీనామా ఆమోదమా, తెలంగాణ ఇవ్వడమా లేదా ప్రభుత్వం పడిపోయి రాష్ట్రపతి పాలన రావడమా ఇవే జరుగుతాయి. కాబట్టి ఇప్పటికిప్పుడు మంత్రి పదవికి రాజీనామా చేయడం ఎందుకని వారు భావించినట్లుగా తెలుస్తోంది. అయితే మంత్రి పదవులకు రాజీనామా చేయని మంత్రులు సచివాలయానికి వెళతారా లేదా చూడాలి.

Published On July 4, 2011