తెలంగాణ రాష్ట్రాన్ని వ్యతిరేకించిన కుల్దీప్ నయ్యర్

By Srinivas

Published: Tuesday, July 5, 2011, 14:10 [IST]

న్యూఢిల్లీ: ప్రముఖ కాలమిస్టు కుల్దీప్ నయ్యర్ తెలంగాణ ప్రత్యేక రాష్ట్రంగా ఏర్పడటాన్ని మరోసారి వ్యతిరేకించారు. దేశ రాజధాని న్యూఢిల్లీలో తెలంగాణ ఒక అసందర్భ డిమాండ్ అనే అంశంపై ఏర్పాటు చేసిన సమావేశంలో కుల్దీప్ నయ్యర్ పాల్గొన్నారు. ఈ సందర్భంగా ఆయన మాట్లాడుతూ రాష్ట్రాల విభజన వల్ల సమస్యలు తీరవని చెప్పారు. విభజనతో సమస్య పరిష్కారం అవుతుందని కోవడం సరికాదన్నారు. రాష్ట్ర ప్రగతి దృష్ట్యా సమైక్య రాష్ట్రమే మంచిదని సూచించారు. గతంలో రాష్ట్రాలను విభజించడం వల్ల ఎన్నో రాష్ట్రాలు నష్టపోయాయయన్నారు. అభివృద్ధి కుంటుపడిందన్నారు.

కాగా గతంలో ఒకసారి విజయవాడలో ఓ సమావేశంలో పాల్గొనడానికి వచ్చిన కుల్దీప్ నయ్యర్ ప్రత్యేక తెలంగాణ రాష్ట్రం సరికాదని మీడియా ప్రతినిధులతో మాట్లాడుతూ చెప్పిన విషయం తెలిసిందే. రాష్ట్రం విడిపోతే అభివృద్ధి ఉండదని చెప్పారు. రాష్ట్ర ప్రగతి దృష్ట్యా సమైక్యాంధ్రనే సరియైనదని ఆయన అప్పుడే వ్యాఖ్యానించారు. అప్పుడు ఆయన వ్యాఖ్యలపై తెలంగాణవాదులు మండిపడ్డారు.

Published On July 5, 2011