రాజకీయాల నుండి తప్పుకుంటా: దానం నాగేందర్

By Srinivas

Published: Wednesday, July 6, 2011, 12:19 [IST]

హైదరాబాద్: ఏఐసిసి అధ్యక్షురాలు సోనియా గాంధీ ఆదేశిస్తే తాను రాజకీయాల నుండి తప్పుకుంటానని కార్మిక శాఖ మంత్రి దానం నాగేందర్ బుధవారం అన్నారు. తెలంగాణ కోసం రాజీనామా చేయమని మమ్మల్ని అడిగే హక్కు ఎవరికీ లేదన్నారు. సోనియా రాజీనామా చేయమంటే చేస్తానన్నారు. సోనియా చెబితే రాజీనామాయే కాదు రాజకీయాల నుండే తప్పుకుంటానని చెప్పారు. తెలంగాణ ఐక్య కార్యాచరణ సమితి చైర్మన్ కోదండరామ్, తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుకు తమను రాజీనామాలు అడిగే హక్కు లేదన్నారు.

మమ్మల్ని ఎవరూ వెనుక ఉండి నడిపించలేరన్నారు. మా నాయకురాలు సోనియానే అన్నారు. ఆమె చెప్పినట్లు నడుచుకుంటామని చెప్పారు. అధిష్టానం మాట జవదాటమన్నారు. సోనియాను కించపరిచే పనులు చేయమన్నారు. మిగతా వాళ్లు వాళ్ల వాళ్ల నియోజకవర్గాలలోని సెంటిమెంటు ప్రకారం రాజీనామా చేశారని అన్నారు. స్థానిక ఒత్తిళ్ల మేరకే మా నేతలు రాజీనామా చేశారని వారిపై ఏమీ మాట్లాడమన్నారు. తాను తెలంగాణవాదినో, సమైక్యవాదినో సమయం వచ్చినప్పుడు వెల్లడిస్తానని అన్నారు.

Published On July 6, 2011