సమైక్యవాద ఉద్యమానికి ప్రజల మద్దతు లేదు: కెటిఆర్

By Pratap

Published: Wednesday, July 6, 2011, 12:01 [IST]

హైదరాబాద్‌‌: సమైక్యవాద ఉద్యమానికి సీమాంధ్ర ప్రజల మద్దతు లేదని తెలంగాణ రాష్ట్ర సమితి (తెరాస) శాసనసభ్యుడు కెటి రామారావు అన్నారు. తెలంగాణను అడ్డుకోవడానికి కొంత మంది సీమాంధ్ర పెట్టుబడిదారులు ఆ ఉద్యమాన్ని కృత్రిమంగా సృష్టించారని ఆయన బుధవారం మీడియా ప్రతినిధులతో అన్నారు. తెలంగాణకు మండలి, ప్యాకేజీలు వద్దని, తమకు తెలంగాణ రాష్ట్రం ఏర్పాటు మాత్రమే కావాలని ఆయన అన్నారు. తెలంగాణ రాష్ట్రం ఏర్పాటు చేసి ఆ ప్యాకేజీలేవో సీమాంధ్రకే ఇవ్వాలని ఆయన అన్నారు.

చర్చల పేరుతో తెలంగాణపై కాలయాపన తగదని ఆయన అభిప్రాయపడ్డారు. రాష్ట్రపతి పాలన వస్తే ఏదో జరిగిపోతుందనే ప్రచారం సరి కాదని ఆయన అన్నారు. తెలంగాణ బంద్‌కు సహకరిస్తున్న అన్ని వర్గాలకు ఆయన ధన్యవాదాలు తెలిపారు. అరెస్టయిన తెలంగాణ జెఎసి చైర్మన్ కోదండరామ్‌ను వెంటనే విడుదల చేయాలని ఆయన డిమాండ్ చేశారు. తెలంగాణ రాష్ట్రం ఇవ్వడానికి సీమాంధ్ర నాయకులతో కాంగ్రెసు అధిష్టానం చర్చలు జరపాలని ఆయన సూచించారు.

Published On July 6, 2011