సిపిఎం కార్యాలయంపై తెలంగాణవాదుల దాడి

By Srinivas

Published: Wednesday, July 6, 2011, 12:36 [IST]

నల్గొండ: తెలంగాణవాదులు సిపిఎం పార్టీ కార్యాలయంపై దాడి చేసి ఆ పార్టీ శాసనసభ్యుడు జూలకంటి రంగారెడ్డి ఇంటి ఎదుట ధర్నాకు దిగిన సంఘటన బుధవారం చోటు చేసుకుంది. సిపిఎం పార్టీ సమైక్యాంధ్రకు కట్టుబడి ఉన్నందున నల్గొండ జిల్లాలోని భువనగిరి పట్టణ సిపిఎం పార్టీ కార్యాలయంపో పలువురు తెలంగాణవాదులు దాడి చేశారు. కార్యాలయంలోని ఫర్నీచర్, ఆద్దాలు ధ్వంసం చేశారు. పార్టీ వెంటనే తెలంగాణకు అనుకూలంగా నిర్ణయం తీసుకోవాలని డిమాండ్ చేశారు. లేదంటే పార్టీ నేతలను, పార్టీని తెలంగాణలో ఉండనివ్వమని హెచ్చరించారు.

కాగా మిర్యాలగూడలోని ఆ పార్టీ శాసనసభ్యుడు జూలకంటి రంగారెడ్డి ఇంటిని తెలంగణవాదులు ముట్టడించారు. తెలంగాణ రాష్ట్ర సాధనలో భాగంగా కాంగ్రెసు, టిడిపి, సిపిఐ, టిఆర్ఎస్ పార్టీల శాసనసభ్యులు రాజీనామా చేసినట్లుగా జూలకంటి రాజీనామా చేయాలని డిమాండు చేశారు. ప్రత్యేక తెలంగాణకు పార్టీని ఒప్పించాలని వారు ఆయన ఇంటిముందు డిమాండ్ చేశారు. లేదంటే పార్టీని వీడి బయటకు రావాలని సూచించా రు.

Published On July 6, 2011