తెలంగాణ సత్వర పరిష్కారానికి జెపి డిమాండ్

By Pratap

Published: Thursday, July 7, 2011, 18:06 [IST]

విశాఖపట్నం: తెలంగాణ సమస్యను సత్వరమే పరిష్కరించాలని లోకసత్తా శాసనసభ్యుడు జయప్రకాష్ నారాయణ కేంద్ర ప్రభుత్వాన్ని కోరారు. అయితే తెలంగాణపై హేతుబద్దమైన నిర్ణయం తీసుకోవాలని, అది అందరికీ ఆమోదయోగ్యంగా ఉండాలని ఆయన గురువారం మీడియా ప్రతినిధులతో అన్నారు. తెలంగాణపై సత్వరమే నిర్ణయం తీసుకుని రాష్ట్రంలోని అస్థిర పరిస్థితిని తొలగించాల్సిన బాధ్యత కేంద్ర ప్రభుత్వంపై ఉందని ఆయన అభిప్రాయపడ్డారు. కేంద్ర ప్రభుత్వం తెలంగాణ అంశంపై జాప్యం చేస్తూ పది కోట్ల రాష్ట్ర ప్రజలతో ఆడుకుంటోందని ఆయన విమర్శించారు.

తెలంగాణపై అన్ని పక్షాల అభిప్రాయాలను పరిగణనలోకి తీసుకోవాలని ఆయన అన్నారు. లోక్‌పాల్ బిల్లు పరిధిలోకి ప్రధానిని తీసుకురమ్మని విపక్షాలు డిమాండ్ చేయడంలో అసంబంద్దత లేదని అభిప్రాయపడ్డారు. కొన్ని మినహాయింపులతో ప్రధానిని కూడా లోక్‌పాల్ బిల్లు పరిధిలోకి తీసుకురావాలని, జిల్లా, మండల స్థాయిలోనూ లోక్‌పాల్ వ్యవస్థను ఏర్పాటు చేయాలనీ అభిలషించారు.

Published On July 7, 2011