రాహుల్ వద్ద రివాల్వర్‌తో సంచరించిన వ్యక్తి అరెస్టు

By Pratap

Published: Thursday, July 7, 2011, 11:21 [IST]

లక్నో: కాంగ్రెసు నాయకుడు రాహుల్ గాంధీ వద్దకు రివాల్వర్‌తో వెళ్లడానికి ప్రయత్నించిన ఓ వ్యక్తిని గురువారం ప్రత్యేక రక్షణ బలగం (ఎస్‌పిజి) అదుపులోకి తీసుకున్నారు. ఉత్తరప్రదేశ్‌లోని అలీగఢ్‌లో ఆయన పాదయాత్ర చేస్తుండగా ఈ సంఘటన చోటు చేసుకుంది. ఆ యువకుడు 0.32 బోర్ రివాల్వర్‌తో రాహుల్ గాంధీని సమీపించడానికి ప్రయత్నించాడు. అతన్ని ఉదయ్‌పూర్‌కు చెందిన హరిమోహన్ శర్మగా గుర్తించారు. అతన్ని ఎస్‌పిజి గురువారం ఉదయం ఎనిమిదిన్నర గంటల ప్రాంతంలో అదుపులోకి తీసుకుని ఉత్తరప్రదేశ్ పోలీసులకు అప్పగించింది.

అతను తప్పల్ గ్రామానికి చెందినవాడు. తాను కాంగ్రెసు కార్యకర్తనని అతను చెప్పుకున్నాడు. భూస్వాధీనం వల్ల రైతులు ఎదుర్కుంటున్న సమస్యపై రాహుల్ గాంధీ అలీగఢ్‌కు పాదయాత్ర చేస్తుండగా ఈ సంఘటన చోటు చేసుకుంది. ఆయన పాదయాత్ర మూడో రోజుకు చేరకుంది.

Published On July 7, 2011