బైకు నడిపిన తెలుగుదేశం శాసనసభ్యురాలు సీతక్క

By Srinivas

Published: Thursday, July 7, 2011, 12:00 [IST]

వరంగల్: తెలుగుదేశం పార్టీ శాసనసభ్యురాలు సీతక్క గురువారం ద్విచక్ర వాహనం నడిపి స్థానికంగా అందరినీ ఆశ్చర్యానికి గురి చేశారు. ములుగు శాసనసభ్యురాలు అయిన సీతక్క అదే ప్రాంతంలో ద్విచక్ర వాహనంపై తిరిగి సందడి చేశారు. గత కొద్దికాలంగా నిస్తేజంగా ఉన్న తెలుగుదేశం పార్టీ కార్యకర్తలలో ఉత్సాహం నింపారు. ప్రత్యేక తెలంగాణ రాష్ట్రం విషయంలో గత కొంతకాలంగా తెలుగుదేశం పార్టీ ఇబ్బందులకు గురైంది. తమ నియోజకవర్గంలో తాము తిరగలేని పరిస్థితి ఎదురయింది. అయితే రాజీనామాలు చేసిన తర్వాత టిడిపి తెలంగాణ ప్రజాప్రతినిధుల్లో కొత్త ఉత్సాహం కనిపిస్తోంది.

ఆ ఉత్సాహంలోనే సీతక్క బైక్ నడిపి తమ కార్యకర్తలను ఉత్సాహపరిచినట్లుగా కనిపిస్తోంది. సోమవారం తెలుగుదేశం పార్టీ ప్రజాప్రతినిధులు రాజీనామాలు చేసిన అనంతరం సైతం ఆ పార్టీ శాసనసభ్యురాలు కవిత గన్ పార్కు వద్ద గిరిజనులతో కలిసి చిందేశారు. ఆమె డాన్సు చేస్తున్న సమయంలో మిగతా టిడిపి సభ్యులు ఆమెను చప్పట్లు కొడుతూ ఉత్సాహపరిచారు.

Published On July 7, 2011