బస్సు యాత్ర వద్దని కోదండరామ్, కుదరదన్న ఎర్రబెల్లి

By Srinivas

Published: Thursday, July 7, 2011, 12:48 [IST]

హైదరాబాద్: తెలంగాణ ప్రాంతానికి చెందిన తెలుగుదేశం పార్టీ శాసనసభ్యులు చేపట్టిన బస్సు యాత్రను వాయిదా వేసుకోవాలని తెలంగాణ ఐక్య కార్యాచరణ సమితి చైర్మన్ కోదండరాం కోరగా అందుకు కుదరదని టిటిడిపి శాసనసభ్యులు గురువారం తేల్చి చెప్పారు. ప్రత్యేక తెలంగాణ రాష్ట్ర ఆకాంక్షను తెలంగాణ ప్రజల్లోకి మరింత లోతుగా ప్రజల్లోకి తీసుకు వెళ్లాలనే ఉద్దేశ్యంతో రంగారెడ్డి జిల్లాలోని మేడ్చల్ నుండి గురువారం మధ్యాహ్నం తెలుగుదేశం పార్టీ పదిరోజుల బస్సు యాత్రను ప్రారంభిస్తున్న విషయం తెలిసిందే. ఈ నేపథ్యంలో బస్సు యాత్రకు కొన్ని గంటల ముందు ఉదయం టిటిడిపి శాసనసబ్యులు ఎర్రబెల్లి దయాకర రావు, రేవంత్ రెడ్డి, మోత్కుపల్లి నరసింహులు తదితరులు కోదండరాంను కలిసి తమ బస్సు యాత్రకు మద్దతు ప్రకటించాలని కోరారు.

రాజీనామా చేసిన అందరు శాసనసభ్యులతో కలిసి ఓ కార్యాచరణ రూపొందిస్తున్నామని అప్పటి వరకు బస్సు యాత్రను వాయిదా వేసుకోవాలని కోదండరాం టిడిపి శాసనసభ్యులను కోరినట్లుగా తెలుస్తోంది. కార్యాచరణ రూపొందించే వరకు వేచి చూడాలని వారిని కోదండరాం కోరారు. అయితే తాము బస్సు యాత్రకు ఇప్పటికే అంతా నిర్ణయం తీసుకున్నామని సాయంత్రమే ప్రారంభమవుతున్నందున వాయిదా సాధ్యం కాదని ఎర్రబెల్లి చెప్పినట్లుగా తెలుస్తోంది. బస్సు యాత్రకు కనీసం సంఘీభావం అయినా ప్రకటించాలని వారు కోదండరాంను కోరగా ఆయన జెఏసిలో ఆలోచించి నిర్ణయం తీసుకుంటామని చెప్పినట్లుగా తెలుస్తోంది. మొత్తానికి బస్సు యాత్రపై కోదండరాం నుండి టిడిపి ఎలాంటి హామీ రాలేదు.

Published On July 7, 2011