అందుకు నేను కారణం కాదు: మాజీ సిఎం రోశయ్య

By Srinivas

Published: Friday, July 8, 2011, 13:59 [IST]

హైదరాబాద్: ప్రత్యేక తెలంగాణ రాష్ట్రం అంశం కేంద్ర ప్రభుత్వం నాన్చుతుందని తాను భావించడం లేదని మాజీ ముఖ్యమంత్రి కొణిజేటి రోశయ్య శుక్రవారం విలేకరులతో మాట్లాడుతూ అన్నారు. ఓ సమస్య తీర్చితే మరో సమస్య ఉత్పన్నమవుతుందనే ఉద్దేశ్యంతోనే కేంద్రం తెలంగాణ అంశంపై ఆలోచన చేస్తుందని రోశయ్య అభిప్రాయపడ్డారు. తెలంగాణపై కేంద్రమే నిర్ణయం తీసుకోవాలని ఆయన అభిప్రాయపడ్డారు. ఇరు ప్రాంతాల నేతలతో చర్చలు జరిపితే తప్పు లేదన్నారు. డిసెంబర్ 9న కేంద్రమంత్రి చిదంబరం ప్రకటన తర్వాత చాలా పరిణామాలు చోటు చేసుకున్నాయన్నారు. అన్ని పరిణామాలను అధిష్టానానికి వివరించానని చెప్పారు. తాను ముఖ్యమంత్రిగా ఉన్నప్పుడు తెలంగాణపై తీర్మానం చేయక పోవడానికి తాను కారణం కాదన్నారు.

కాగా అంతకుముందు ఆయన వైయస్ రాజశేఖర రెడ్డితో ఉన్న అనుబంధాన్ని ఓ టీవీ ఛానల్‌తో పంచుకున్నారు. వైయస్ తనను అన్నా అని పిలిచే వారని చెప్పారు. ఆయనతో తనకు విడదీయరాని బంధం ఉంద్నారు. రాష్ట్రానికి భారం కలిగించే పథకాలు వద్దని తాను సూచించినప్పటికీ పథకాలకు వైయస్ ఎప్పుడూ వెనక్కి తగ్గలేదన్నారు. ఇద్దరి మధ్య ఏవైనా బేధాభిప్రాయాలు వచ్చినప్పటికీ సహృదయంతో అర్థం చేసుకునే వారన్నారు.

Published On July 8, 2011