చిరుకున్న దమ్ము వైయస్ జగన్‌కు లేదు: లగడపాటి

By Pratap

Published: Saturday, July 9, 2011, 20:55 [IST]

హైదరాబాద్‌: తెలంగాణ సెంటిమెంటును గౌరవిస్తామని వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి చేసిన ప్రకటనపై కాంగ్రెసు సీమాంధ్ర పార్లమెంటు సభ్యుడు లగడపాటి రాజగోపాల్ తీవ్ర వ్యాఖ్యలు చేశారు. చిరంజీవికి ఉన్న ధైర్యం వైయస్ జగన్‌కు లేదని ఆయన శనివారం మీడియా ప్రతినిధుల సమావేశంలో వ్యాఖ్యానించారు. దమ్మున్న మగాడిలా చిరంజీవి సమైక్యాంధ్రకు మద్దతు తెలిపారని ఆయన ప్రశంసించారు. ఎన్నికలకు ముందు చిరంజీవి తెలంగాణ అన్నారని, ఓడిపోయిన తర్వాత సమైక్యాంధ్ర నినాదం తీసుకున్నారని ఆయన గుర్తు చేశారు. తెలంగాణ ఇచ్చే శక్తీ తెచ్చే శక్తీ తమకు లేదని చెప్పిన వైయస్ జగన్‌కు రాష్ట్ర సమస్యపై కచ్చితమైన వైఖరి చెప్పే శక్తి లేదా అని ఆయన అడిగారు. కేవలం ముఖ్యమంత్రి కుర్చీలో కూర్చునే శక్తి జగన్‌కు ఉందా అని ఆయన అడిగారు.

తెలంగాణపై తెలుగుదేశం పార్టీ అధ్యక్షుడు నారా చంద్రబాబు నాయుడిది రెండు కళ్ల సిద్ధాంతమైతే వైయస్ జగన్‌ది రెండు చెవుల సిద్ధాంతమని ఆయన వ్యాఖ్యానించారు. ఓ పార్టీ అధినేతగా తెలంగాణపై జగన్ స్పష్టమైన వైఖరి వెల్లడించాలని ఆయన డిమాండ్ చేశారు. కాంగ్రెసులో ఉన్నప్పుడు కచ్చితమైన వైఖరి చెప్పగల శక్తి ఉన్నప్పుడు పార్టీ పెట్టిన తర్వాత జగన్‌కు ఆ శక్తి ఎందుకు లేదని ఆయన పార్లమెంటులో సమైక్యాంధ్ర ప్లకార్డును ప్రదర్శించిన ఉదంతాన్ని గుర్తు చేస్తూ అన్నారు. వైయస్సార్ అడుగుజాడల్లో నడుస్తానన్న వ్యక్తి జగన్ తెలంగాణపై ఎందుకు స్పష్టమైన వైఖరి చెప్పలేకపోయాడని ఆయన ప్రశ్నించారు. తెలంగాణపై స్పష్టమైన వైఖరి చెప్పలేనప్పుడు పార్టీ ఎందుకని ఆయన అడిగారు.

తాను పెట్టుబడిదారుడినే గానీ దోపిడీదారుడిని కానని ఆయన అన్నారు. చిన్న రాష్ట్రాలపై కాంగ్రెసుకు కచ్చితమైన వైఖరి ఉందని, చిన్న రాష్ట్రాల ఏర్పాటుపై రెండో ఎస్సార్సీని ఏర్పాటు చేయాలని కాంగ్రెసు వర్కింగ్ కమిటీ (సిడబ్ల్యుసి)లో నిర్ణయం తీసుకుందని ఆయన అన్నారు. తెలంగాణపై ఏకాభిప్రాయం లేదని, తెలంగాణ వస్తుందనే నమ్మకం లేదని ఆయన అన్నారు. అయితే, తెలంగాణకు శాశ్వత పరిష్కారం త్వరలోనే లభిస్తుందని, త్వరలో అఖిల పక్ష సమావేశం ఏర్పాటవుతుందని ఆయన అన్నారు. వైయస్ రాజశేఖర రెడ్డి ఇందిరమ్మ రాజ్యం తెస్తానని చెప్పారే గానీ జగన్ రాజ్యం వస్తుందని చెప్పలేదని ఆయన అన్నారు.

Published On July 9, 2011