బెజవాడ రౌడీలు టైటిల్‌పై ఎదురుతిరిగిన వర్మ

By Pratap

Published: Friday, July 15, 2011, 17:03 [IST]

విజయవాడ: బెజవాడ రౌడీలు చిత్రం పేరు మార్పుపై దర్సక, నిర్మాత రామ్ గోపాల్ వర్మ ఎదురు తిరిగారు. సినిమా పేరు మారుస్తామని వర్మ, ఆయన స్నేహిడుతు లగడపాటి రాజగోపాల్ మాట ఇచ్చారని తెలుగుదేశం పార్టీ విజయవాడ నగర అధ్యక్షుడు వల్లభనేని వంశీ ప్రకటించిన కొద్ది గంటలకే - తాను టైటిల్ మార్చే ప్రసక్తే లేదని వర్మ చెప్పేశారు. చిత్ర నిర్మాణాన్ని పర్యవేక్షించడానికి విజయవాడ వచ్చిన ఆయన ఓ తెలుగు టీవీ చానెల్ ప్రతినిధితో మాట్లాడారు. సినిమా పేరు మారుస్తానని తాను ఇవ్వలేదని ఆయన చెప్పారు. పేరు మార్చే ప్రసక్తే లేదని ఆయన స్పష్టం చేశారు. విజయవాడ పార్లమెంటు సభ్యుడు లగడపాటి రాజగోపాల్‌కు తాను అటువంటి హామీ ఏమీ ఇవ్వలేదని ఆయన అన్నారు.

సినిమాకు ఆ టైటిల్ పెట్టడంలో తన ఉద్దేశం ఏమిటో సినిమా చూసిన తర్వాతనే అర్థమవుతుందని ఆయన అన్నారు. తాను విజయవాడ చరిత్రను వక్రీకరించడం లేదని చెప్పారు. సినిమా చూసిన తర్వాత తాను టైటిల్ మార్చడానికి ఎందుకు ఇష్టపడలేదో ప్రేక్షకులకు అర్థమవుతుందని ఆయన అన్నారు. రామ్ గోపాల్ వర్మ విజయవాడలో సిద్ధార్థ కళాశాలలో చదివారు. తాను చూసిన, అర్థం చేసుకున్న విషయాలను సినిమాగా చిత్రీకరిస్తున్నట్లు వర్మ చెప్పారు.

Published On July 15, 2011