తెలంగాణకు జెసి కొత్త కొలికి, బొత్సపై కామెంట్

By Srinivas

Published: Sunday, July 17, 2011, 15:47 [IST]

హైదరాబాద్: ప్రత్యేక తెలంగాణ విషయంలో మాజీ మంత్రి జెసి దివాకర్ రెడ్డి కొత్త కొలికి తెరపైకి తీసుకు వచ్చారు. ఇప్పటి వరకు హైదరాబాదే అసలు సమస్య అన్న అంశాన్ని ఆయచన పక్కకు నెట్టేసి నీటి వివాదం అసలు సమస్య అని చెప్పుకొచ్చారు. తెలంగాణ అంశంలో హైదరాబాదు ముఖ్యం కాదని నీటి వివాదమే ముఖ్యమని ఆయన ఆదివారం అన్నారు. కృష్ణా జలాల పంపకంలో సమస్యలు తలెత్తుతాయని ఆయన అభిప్రాయపడ్డారు. రాబోయే రోజుల్లో నీటి ఉద్యమాలు తప్పక పోవచ్చునని ఆయన అన్నారు. ముఖ్యమంత్రి సీటును మూడు ప్రాంతాల వారు పంచుకుంటే తప్పు లేదని ఆయన అభిప్రాయపడ్డారు.

తాను ఎవరినీ కించపర్చడానికి ముఖ్యమంత్రి పదవుల పంపకాలపై మాట్లాడలేదని అన్నారు. ప్రత్యేక తెలంగాణ రాష్ట్రాన్ని తెలంగాణ ప్రజలు కోరుకోవడంలో తప్పు లేదన్నారు. ఆంధ్రా నేతలు ముఖ్యమంత్రిగా ఉన్నప్పుడే తెలంగాణ ఉద్యమం ఊపందుకుంటుందని అన్నారు. రాజకీయ అధికారం ఏ ప్రాంతానికి ఉంటే ఆ ప్రాంతం అభివృద్ధి చెందుతుందన్నది తన వాదన అని అన్నారు. తెలంగాణ మంత్రులు ఊబిలో ఉన్నారని అన్నారు. నేతలు అధికారం కోసమే ప్రత్యేక వాదన వినిపిస్తున్నారని అన్నారు. నిన్నగాక మొన్న రెండు సార్లు గెలిచిన పిసిసి అధ్యక్షుడు బొత్స సత్యనారాయణ ముఖ్యమంత్రి సీటును కోరుతున్నారని గుర్తు చేశారు.

Published On July 17, 2011