ఒక్క ఛాన్సిస్తే అందరినీ జైల్లో పెట్టేస్తా: టిజి

By Srinivas

Published: Sunday, July 17, 2011, 14:42 [IST]

న్యూఢిల్లీ: తెలంగాణ విషయంలో మంత్రి టిజి వెంకటేష్ ఆదివారం వివాదాస్పదమైన వ్యాఖ్యలు చేశారు. తనను ఒక్కరోజు హోం మినిస్టర్ సీట్లో కూర్చుండబెడితే తెలంగాణపై దౌర్జన్యం చేస్తున్న వారిని జైళ్లో పెట్టిస్తానని ఆయన న్యూఢిల్లీలో విలేకరులతో మాట్లాడుతూ హెచ్చరించారు. ఆయన చేసిన వ్యాఖ్యలపై తెలంగాణ ప్రజాప్రతినిధులు తీవ్రస్థాయిలో మండిపడ్డారు. తెలంగాణ కోసం పోరాడే వారిని జైళ్లో పెడతామన్న ఆయన వ్యాఖ్యలను తీవ్రంగా ఖండించారు. టిఆర్ఎస్ ఎమ్మెల్యే హరీష్ రావు మాట్లాడుతూ టిజిపై గవర్నర్ చర్యలు తీసుకోవాలని సూచించారు. శాంతిభద్రతలు సిఎం చేతిలో ఉంటాయన్నారు. టిజి పిచ్చాసుపత్రి నుండి వచ్చినట్టున్నారని టిడిపి బహిష్కృత ఎమ్మెల్యే నాగం జనార్దన్ రెడ్డి అన్నారు.

కాగా టిజి వెంకటేష్ తన వ్యాఖ్యలను తర్వాత సైతం సమర్థించుకున్నారు. ఒక్కరోజు తనకు అవకాశం ఇస్తే విధ్వంసం సృష్టించే వారిని జైళ్లో పెడతానని అనడం తన వ్యక్తిగతమని వివరించారు. అయితే విధ్వంసం సృష్టించే వారు ఎవరికైనా ఒకే న్యాయం ఉంటుందని అన్నారు. తన వ్యాఖ్యలు వ్యక్తిగతమైనప్పటికీ భద్రత దృష్ట్యా అలాంటి వ్యాఖ్యలు చేశానని అన్నారు. సీమాంధ్ర సేన ఎవరి పైనో విద్వంసం సృష్టించడానికి కాదని చెప్పారు.

Published On July 17, 2011