కెసిఆర్ అందరికీ అంటించాడు: టిజి వెంకటేష్

By Srinivas

Published: Sunday, July 17, 2011, 13:23 [IST]

న్యూఢిల్లీ: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుకు పచ్చకామెర్లు వచ్చాయని దానిని ఆయన అందరికీ అంటించాడని మంత్రి టిజి వెంకటేష్ ఆదివారం న్యూఢిల్లీలో విలేకరులతో మాట్లాడుతూ ధ్వజమెత్తారు. కెసిఆర్ తన వ్యాధిని అందరికీ అంటించి ఉద్యమం చేస్తున్నారని విమర్శించారు. అత్యధిక సీమాంధ్ర ప్రజల నిర్ణయానుసారంగా తాము నిర్ణయం తీసుకుంటామని టిజి అన్నారు. సమైక్యాంధ్ర కోసం రాజీనామా చేసే ప్రసక్తి లేదన్నారు.

కాంగ్రెసు పార్టీ అధిష్టానం అన్ని ప్రాంతాల వారితో చర్చలు జరపాలని ఆయన అభిప్రాయపడ్డారు. ఆ తర్వాతే తెలంగాణపై నిర్ణయం తీసుకోవాలని సూచించారు. అభివృద్ధిని చూసి కలిసే ఉందామని తెలంగాణవాళ్లు సైతం అంటున్నారని మరో మంత్రి ఏరాసు ప్రతాప రెడ్డి అన్నారు. కాగా సమైక్య నినాదం అధిష్టానానికి వివరించడానికి ఇప్పటికే టిజి, ఏరాసు న్యూఢిల్లీ చేరుకున్నారు. సాయంత్రం మరికొందరు నేతలు ఢిల్లీ వెళ్లనున్నారు. సోమవారం ఉదయం ఎంపీ కావూరి సాంబశివరావు ఇంట్లో అందరూ భేటీ అవుతారు.

Published On July 17, 2011