గుజరాత్‌లో ముంబయి తరహా పేలుళ్ల ప్లాన్ విఫలం

By Srinivas

Published: Sunday, July 17, 2011, 15:07 [IST]

అహ్మదాబాద్: గుజరాత్‌లోని అహ్మదాబాద్‌లో పేలుళ్లకు ప్లాన్ చేసిన తీవ్రవాదులను ఆ రాష్ట్ర పోలీసులు పట్టుకున్నారు. ముంబయి తరహా పేలుళ్లకు వారు ప్రయత్నాలు చేస్తుండగా పోలీసులు గుర్తించి ముగ్గురిని అరెస్టు చేశారు. మిగిలిన వారు పారిపోయారు. వారి కోసం పోలీసులు తీవ్రంగా గాలిస్తున్నారు. త్వరలో రానున్న శ్రీకృష్ణ జన్మాష్టమి పండుగ సందర్భంలో భారీ పేలుళ్లకు తీవ్రవాదులు స్కెచ్ వేసినట్లుగా పోలీసులు అనుమానిస్తున్నారు. అయితే గుజరాత్ పోలీసులు వారి కుట్రను వమ్ము చేశారు. దీంతో అహ్మదాబాదుకు ముంబయి తరహా భారీ ముప్పు తప్పిపోయింది.

తీవ్రవాదులు పాన్ మసాలా బాక్సులలో నాటు బాంబులు అమర్చి పేలుళ్లకు ప్లాన్ చేసినట్లుగా తెలుస్తోంది. తీవ్రవాదులు ఓ ఇంట్లో నాటుబాంబులను తయారు చేస్తుండగా పోలీసులు పట్టుకున్నారు. 10 నాటు బాంబులను స్వాధీనం చేసుకున్నారు. అదుపులోకి తీసుకున్న ముగ్గురిని పోలీసులు విచారిస్తున్నారు. వీరికి ముంబయి పేలుళ్లతో ఉన్న లింకులపై కూడా విచారిస్తున్నారు.

Published On July 17, 2011