వైయస్ జగన్ వెంట మరో కాంగ్రెసు ఎమ్మెల్యే

By Pratap

Published: Tuesday, July 19, 2011, 8:54 [IST]

కర్నూలు: కర్నూలు జిల్లాలో కాంగ్రెసు పార్టీకి మరో దెబ్బ తగిలింది. ఇప్పటికే పాణ్యం శాసనభ్యుడు కాటసాని రాంభూపాల్ రెడ్డి వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి వెంట నడుస్తుండగా, తాజాగా మరో శాసనసభ్యుడు కూడా వైయస్ జగన్ ఓదార్పు యాత్రలో పాల్గొన్నారు. కర్నూలు జిల్లా ఎమ్మిగనూరు శాసనసభ్యుడు చెన్నకేశవ రెడ్డి సోమవారం వైయస్ జగన్ ఓదార్పు యాత్రలో పాల్గొన్నారు. కాటసాని రాంభూపాల్ రెడ్డితో పాటు చెన్నకేశవ రెడ్డి ఈ ఓదార్పులో పాల్గొని జగన్‌కు మద్దతు తెలిపారు.

కర్నూలు జిల్లాలో సోమవారం వైయస్ జగన్ ఓదార్పు యాత్రను ప్రారంభించిన విషయం తెలిసిందే. జిల్లాలో ఆయన ఓదార్పు యాత్ర ఈ నెల 30వ తేదీ వరకు సాగుతుంది. దాదాపు 203 గ్రామాలను సందర్శించి 31 కుటుంబాలను ఆయన పరామర్శిస్తారు. ఆయన సోమవారం సాయంత్రం తనకు మద్దతు తెలుపుతున్న ప్రజారాజ్యం పార్టీ శాసనసభ్యురాలు శోభానాగిరెడ్డి నియోజకవర్గం ఆళ్లగడ్డలో ఓదార్పు యాత్ర చేశారు.

Published On July 19, 2011