పయ్యావుల కేశవ్‌కు చంద్రబాబు నాయుడు క్లాస్

By Pratap

Published: Friday, July 22, 2011, 19:53 [IST]

హైదరాబాద్: తమ పార్టీ సీమాంధ్ర నాయకుడు పయ్యావుల కేశవ్‌కు తెలుగుదేశం పార్టీ అధ్యక్షుడు నారా చంద్రబాబు నాయుడు క్లాస్ తీసుకున్నారు. తెలంగాణలో తాము ఆత్మాహుతి దాడులకు దిగుతామని పయ్యావుల కేశవ్ ఇటీవల గుంటూరులో చేసిన వ్యాఖ్య పార్టీలో తీవ్ర దుమారం రేపింది. పయ్యావులపై పార్టీ తెలంగాణ నేత రేవంత్ రెడ్డి తీవ్ర వ్యాఖ్యలు చేశారు. దీంతో చంద్రబాబు రంగంలోకి దిగారు. అభ్యంతకరమైన వ్యాఖ్యలు చేయవద్దని చంద్రబాబు పయ్యావుల కేశవ్‌కు సూచించారు. ఇక ముందు అలాంటి వ్యాఖ్యలు చేస్తే తీవ్ర పరిణామాలుంటాయని ఆయన హెచ్చరించారు. విచక్షణ కోల్పోయి మాట్లాడవద్దని సూచించారు.

తెలుగుదేశం పార్టీ ప్రజాప్రతినిధులు రేవంత్ రెడ్డి తీరుపై కూడా నారా చంద్రబాబు నాయుడు శుక్రవారం పార్టీ కార్యకర్తల సమావేశంలో తీవ్ర అసంతృప్తి వ్యక్తం చేశారు. ఒకే పార్టీలోని ఇద్దరు నేతలు ఒకరిపై ఒకరు విమర్శలు చేసుకోవడం సరికాదన్నారు. రేవంత్ రెడ్డి వ్యక్తిగత విమర్శలు బాధించాయని అన్నారు. రేవంత్ రెడ్డి పయ్యావుల కేశవ్‌పై తీవ్రమైన పదజాలంతో వ్యాఖ్యలు చేశారు.

Published On July 22, 2011