తెలంగాణ నేత రేవంత్ రెడ్డిపై చంద్రబాబు అసంతృప్తి

By Srinivas

Published: Friday, July 22, 2011, 14:11 [IST]

హైదరాబాద్: తెలుగుదేశం పార్టీ ప్రజాప్రతినిధులు రేవంత్ రెడ్డి, పయ్యావుల కేశవ్‌పై ఆ పార్టీ అధ్యక్షుడు నారా చంద్రబాబు నాయుడు శుక్రవారం పార్టీ కార్యకర్తల సమావేశంలో తీవ్ర అసంతృప్తి వ్యక్తం చేశారు. ఒకే పార్టీలోని ఇద్దరు నేతలు ఒకరిపై ఒకరు విమర్శలు చేసుకోవడం సరికాదన్నారు. రేవంత్ రెడ్డి వ్యక్తిగత విమర్శలు బాధించాయని అన్నారు. తెలంగాణ రాష్ట్రం కోసం ఆత్మహత్య చేసుకున్న యాదిరెడ్డి ఆత్మహత్య బాధాకరం అన్నారు. యాదిరెడ్డి మృతదేహం ఎపి భవన్‌లోకి అనుమతించక పోవడం సరికాదని అన్నారు.

యాదిరెడ్డి మృతదేహాన్ని ఎపి భవనంలోకి అనుమతించక పోవడంపై ప్రభుత్వంపై పోరాడాల్సింది పోయి అధికారిపై తెలంగాణ రాష్ట్ర సమితి ఎమ్మెల్యే హరీష్ రావు దాడి చేయడం సరికాదన్నారు. ఆందోళనలతో ప్రభుత్వంపై ఒత్తిడి తీసుకు రావాలని సూచించారు. సామాన్య ప్రజలను ఎవ్వరూ రెచ్చగొట్టవద్దన్నారు. వ్యక్తిగత దూషణల వల్ల ఇరు ప్రాంతాల ప్రజలకు ఇబ్బందులు ఉంటాయన్నారు. ఇరు ప్రాంతాల నేతలు సంయమనం పాటించాలని సూచించారు.

Published On July 22, 2011