విజయవాడలో హైదరాబాదుకు చెందిన కారు కలకలం

By Srinivas

Published: Sunday, July 24, 2011, 11:30 [IST]

విజయవాడ: కృష్ణా జిల్లాలోని విజయవాడలో ఓ ఇండికా కారు కలకలం రేపింది. విజయవాడలోని బ్రాహ్మణ వీధిలో పార్కింగ్ చేసిన ఓ కారులో రక్తపు మరకలు ఉండటం స్థానికంగా కలకలం సృష్టించింది. ఈ కారు ఓ అపార్డుమెంటు ముందు ఉంది. అయితే సదరు అపార్టుమెంటు యజమాని ఆదివారం ఉదయం తన కారును తీసే సమయంలో ఈ కారును గమనించారు. కారు లోపల రక్తపు మరకలు ఉన్న విషయాన్ని గమనించి పోలీసులకు సమాచారం అందించారు.

పోలీసులు సంఘటనా స్థలానికి చేరుకొని విచారణ చేపట్టారు. ఇండికా కారు హైదరాబాదులోని హైటెక్ సిటీలోని వ్యక్తికి చెందినదిగా గుర్తించారు. కారులో చెప్పులు, విద్యుత్ వైర్లు, విజిటింగు కార్డు దొరికాయి. విజిటింగు కార్డ్సు ఆధారంగా ఎవరో రియాల్టర్‌ను దుండగులు ఎత్తుకు వచ్చి హత్య చేసి ఉంటారని అనుమానం వ్యక్తం చేస్తున్నారు. అయితే ఇప్పుడే పూర్తిగా వివరాలు తెలియవని చెప్పారు. పూర్తి విచారణ అనంతరం వివరాలు వెల్లడిస్తామని చెప్పారు.

Published On July 24, 2011