ఆయన పైనే ఒత్తిడి: స్పీకర్‌పై కోదండరాం గుర్రు

By Srinivas

Published: Sunday, July 24, 2011, 12:44 [IST]

హైదరాబాద్: ప్రత్యేక తెలంగాణ రాష్ట్రం కోరుతూ రాజీనామాలు సమర్పించిన తెలంగాణ ప్రజాప్రతినిధుల రాజీనామాలు తిరస్కరించిన సభాపతి నాదెండ్ల మనోహర్‌పై తెలంగాణ ఐక్య కార్యాచరణ సమితి చైర్మన్ ఆచార్య కోదండరామ్ ఆదివారం ఆగ్రహం వ్యక్తం చేశారు. స్పీకర్ తీసుకున్న నిర్ణయం రాజ్యాంగ విరుద్దమని అభిప్రాయపడ్డారు. భావోద్వేగానికి, ఒత్తిడికి గురైంది తెలంగాణ ప్రజా ప్రతినిధులు కాదని స్పీకరే అని అన్నారు. ప్రజా అభిప్రాయాలకు పరిగణలోకి తీసుకోకుండా రాజీనామాలను తిరస్కరించిన నాదెండ్ల ఆ పదవికి అనర్హుడు అన్నారు. తెలంగాణ ప్రజా ప్రతినిధులు మరోసారి రాజీనామాలు చేయాలని ఆయన పిలుపునిచ్చారు.

స్పీకర్ రాజీనామాలు ఆమోదించక పోవడంపై పార్టీలకతీతంగా అన్ని పార్టీల నేతలు ఆగ్రహం వ్యక్తం చేశారు. తెలంగాణ ప్రజా ప్రతినిధులు మరోసారి రాజీనామాలకు వెనకాడవద్దని వరంగల్ మాజీ ఎంపీ, టిఆర్ఎస్ నేత వినోద్ కుమార్ అన్నారు. స్పీకర్ నిర్ణయం సరైనది కాదన్నారు. తాము ఒత్తిడితో రాజీనామాలు చేయలేదని టిడిపి రాములు అన్నారు. తెలంగాణ కోసం అవసరమైతే విడివిడిగా వెళ్లి రాజీనామాలు సమర్పించేందుకు సిద్ధమని ప్రకటించారు. స్పీకర్ రాజీనామాలు ఆమోదించక పోవడం శోచనీయం అన్నారు.

Published On July 24, 2011